सरकारं पेट्रोलियम पदार्थय् छुं भच्चा भाः क्वकाल

सरकारी गाडि निषेधया घोषणा

येँ (झीगु स्वनिगः)

वंगु वालय् जक भाः थकाःगु पेट्रोलियम पदार्थया भाः सरकारं छुं भच्चा जूसां क्वकाःगु दु । भाः थकाःगु विरोधय् विद्यार्थीत, युवा नापं प्यखेरं विरोध यानाः हःगु नापं युवा विद्यार्थीतय्सं वंगु बुधवाः आह्वान याःगु स्वनिगः बन्दयात जनतां समर्थन याःगु अले स्वनिगलं पिने तकं बन्दया लिच्वः लानावंगुलिं छगू कथं सरकारं न्हासं चुयाः हे छुं भच्चा जक जूसां भाः क्वकाःगु खः । वाणिज्य तथा आपूर्ति मन्त्री लेखराज भट्टं म्हिगः विहिवाः थःगु हे मन्त्रालय् दुने पत्रकार सम्मेलन यानाः पेट्रोल, डिजेल, मचिकं नापं जा थुइगु ग्यासय् छुं भच्चा जक जूसां भाः क्वकयागु घोषणा यानादीगु खः ।
सरकारं पेट्रोल छगू लिटरय् ३ तका, डिजेल व मचिकनय् ४ तका अले जा थुइगु छगः ग्यासय् ८५ तकाया ल्याखं भाः क्वकाःगु दु ।

मन्त्रालय दुने हे याःगु पत्रकार सम्मेलनय् मन्त्री भट्टं धयादिल ‘प्रधानमन्त्रीया निर्देशन व वाणिज्य मन्त्रालया अवधारणा कथं भाः क्वकयागु खः ।’ अथे थाहां वंगु भाः हाकनं क्वकायेमालेवं पेट्रोलियम पदार्थ अभाव जुइगु अवस्था दु धकाः तकं मन्त्रीं धयादिल ।
वय्कलं धयादिल ‘आः हे समस्या दु भाः क्वकायेवं गुगु कथं चिकं हयेगु खः ? चिकं हयेगु खःसा अर्थ मन्त्रालयपाखें ध्यबा बिइमाल ।’ आःया समस्याया जड धैगु अर्थ मन्त्रालय खः धकाः जिकिरयासें वाणिज्य तथा आपूर्ति मन्त्री लेखराज भट्टं अर्थमन्त्रालयपाखें समन्वय मयाःगुलिं समस्या जटील जुयाः वनाच्वंगु दु धकाः नं द्वपं बियादिल ।

पेट्रोलियम पदार्थ भाः थकाःगु विरोधय् आन्दोलनय् क्वहां वयाच्वंपिं थीथी राजनीतिक दलया १३ गू विद्यार्थी संगठनया मंकाः मु“ज्या च्वनाः गबले तक थकाःगु पूरा भाः हे क्वकाइ मखु अबले तक आन्दोलन यानाः हे च्वनेगु धकाः निर्णय याःगु दु ।
म्हिगः विहिवाः च्वंगु मु“ज्यां सरकारपाखें पेट्रोलियम पदार्थय छुं भच्चा जक भाः क्वकाःगुयात अस्वीकारयासें आवंलि आन्दोलन व वार्तायात नाप नापं न्ह्याकेगु धकाः नं निर्णय याःगु दु ।

विद्यार्थीतय्सं आन्दोलनया झ्वलय् थौं शुक्रवाःनिसें शहरय् सरकारी गाडीयात निषेध यानाः सतकय् चलेयाके मबिइगु धकाः नं घोषणा याःगु दु । आन्दोलया न्हूगु ज्याझ्वः कथं थौं शुक्रवाःनिसें हे देय्न्यंकंया क्याम्पस न्ह्यःने अनिश्चितकालिन प्रदर्शन यायेगु धकाः नं निर्णय याःगु दु । अथे हे शनिवाः देय्न्यंकं अन्तक्र्रिया यायेगु, शनिवाः हे बहनी सिठ्ठी जुलुस पिकायेगु नापं १५ गते देय्न्यंकं विरोध सभा यायेगु धकाः नं निर्णय याःगु दु । मचिकं, डिजेल, जा थुइगु ग्यास नापंं पेट्रोलियम पदार्थय् भाः थकाःगु विरुद्ध वर्तमान सरकारया नेतृत्व यानाच्वंगु एकीकृत नेकपा (माओवादी)या भातृ संगठन अखिल क्रान्तिकारी, नेपाली कांग्रेसया भातृ संगठन नेपाल विद्यार्थी संघ, एमालेया भातृ संगठन अनेरास्ववियु, अथे हे सरकारय् दुथ्यानाच्वंगु थीथी मधेसवादी दलया विद्यार्थी संगठनत नापं थीथी राजनीतिक दलया भातृ संगठन नापं यानाः १३ गू विद्यार्थी संगठनत दुथ्यानाच्वंगु दु ।