जावलाख्यः व लगंख्यःया अतिक्रमित पसः व फुटपाथ चीकीगु

यल (झीगु स्वनिगः)

यल उपमहानगरपालिकां नगरया मुख्य व्यापारिक क्षेत्र जावलाख्यः व लगंख्यःसं सार्वजनिक स्थल अतिक्रमण यानाः तयातःगु पसः व फुटपाथ पूर्णरुपं चीकीगु जूगु दु ।
उपमहानगरपालिकां थ्व स्वयाः न्ह्यः येँ महानगरपालिकाया अतिक्रमित स्थलया पसः व फुटपाथ चीकेत याःगु कुतः प्रभावकारी मजूगु व हाकनं व्यापारीतय्सं व्यवसाय न्ह्याकूगु न्ह्यःथना अज्याःगु प्रवृत्ति जुइमबीकेत कडा लिसे पूर्णरुपय् चीकेगु कथं गृहकार्य न्ह्याकूगु खः ।

उपमहानगरपालिकां सार्वजनिक क्षेत्रय् अतिक्रमित यानाः अव्यवस्थित तरिकां तयातःगु पसः फुटपाथ चीकेगु नितिं सम्बद्ध व्यापारीतय्त मौखिकरुपं सुचं बिइधुंकूगु व छवाःयादुने हाकनं लिखित सुचं पिकयाः फागुनया न्हापांगु वालंनिसें चीकेगु अभियान न्ह्याकेगु जानकारी ब्यूगु खः । उपमहानगरपालिया बजाः नियन्त्रण लिसे कार्यान्वयन शाखाया नगर प्रहरी प्रमुख प्रहरी नायब उपरीक्षक कदमलाल महर्जनं नगरया सौन्दर्यतायात हे कुरुप यायेगु कथं अव्यवस्थित रुपं सार्वजनिक जग्गा अतिक्रमण यानाः दयेकातःगु मू मू क्षेत्र जावलाख्यः, लगंख्यःया पसः व फुटपाथ थुनेत्यंगु जानकारी बियादीगु खः ।

वय्कलं अव्यवस्थित व अतिक्रमित पसः व फुटपाथ चीकेगु ज्यायात प्रभावकारी दयेकेत माःगु तयारी जुयाच्वंगु जानकारी बियादिसें उकिया नितिं स्थानीय क्लब, टोल सुधार समिति व प्रहरी प्रशासनलिसे सहलह यानाः कडारुपं चीकेगु जानकारी बियादीगु खः ।
मुख्य अतिक्रमित क्षेत्र जावलाख्यः व लगंख्यःया पसः व फुटपाथ चीकेत उपमहानगरपालिकाया छुं ई न्ह्यः जक क्वचाःगु झिंखुक्वःगु परिषद्ं पारित यायेधुंकूगु दु । प्रधानमन्त्री ज्याकू, संसदीय, अर्थ व श्रम सम्बन्ध समिति, स्थानीय विकास मन्त्रालयपाखें प्राप्त निर्देशन कथं सार्वजनिक स्थलय् अतिक्रमण यानाः तयातःगु पसः व फुटपाथ व्यापारीतय्त चीकेगु ज्यायात व्यवहारय् लागू याइगु उपमहानगरपालिकां जानकारी ब्यूगु खः ।

नगरपालिकाया अनुमानित डाटा कथं लगंख्यःसं सच्छिगू निसें सत्यातक्क व जावलाख्यःसं च्यय्गू अतिक्रमित पसः व फुटपाथ तयातःगु दु । वि.सं. २०६३ सालतक्क यल उपमहानगरपालिकाया राजस्व महाशाखां भूमि कर धकाः उगु व्यापारिक क्षेत्रया फुटपाथपाखें दच्छिया झिंन्यागू निसें नीगू लख तका राजस्व म्हयेगु यानाच्वंगु खःसां नं न्यादँनिसें छु नं संकलन जूगु मदु । उपमहानगरपालिकां उगु क्षेत्रपाखें न्हियान्हिथं ठेलागाडा व खाटपाखें नीतका, साइकलवालापाखें झितका व बँ पसःपाखें न्यातका राजस्व कयाः वयाच्वंगु खः ।