नेवाः ताम्सालि· नापं वनेमाः

नेवाः लागा स्पष्ट मदुनि । नेवाःतय्गु जाति म्हसीका, इतिहास लगायत खँया आधारय् नेवाः स्वायत्त राज्यया सीमा वर्तमान प्रस्तावय् वयाच्वंगु स्वयाः भचा व्यापक जुइ । तर ताम्सालिङ्ग राज्य घेरे यानातःगु स्वयाः पाइगु स्थिति वयेवं ताम्सालिङ्ग राज्यया न्ह्यलुवाःतय्सं उकियात स्वीकार याःगु खनेमदु । सीमा सम्वन्धी थुज्वःगु विवादयात कयाः नकतिनि नेवाः व ताम्सालिङ्ग राज्यया विज्ञत च्वनाः याःगु सहलह वार्ता विना निश्कर्ष क्वचाःगु दु । नेवाः राज्यया गुलिखय् भागत तामाङ्गतय्सं नं दावा यायेवं समस्या न्ह्यःने वःगु खः । निगू राज्यया विज्ञपिसं थःथःगु दावा व अडानयात यथावत तयेवं सहमति मजुसेहे वार्ता असफल जूगु खः ।

नेवाः व ताम्सालिङ्ग राज्यया दावेदारतय्गु अडान नं थःगु थासय्हे दु । तर राज्य पुनर्संरचना आयोगं न्ह्यव्वयेत्यंगु प्रस्ताव व्यागलं दु । आयोगं वीगु प्रस्ताव स्वयाः नेवाः व ताम्सालिङ्गतय्गु माग स्वयाः भचा व्यागलं जुयाच्वंगु दु । नेवाःतय्सं थःगु प्रदेश दुने लाकेमाः धयावयाच्वंगु भोंत, धौख्यः, थेंयाःगु नेवाःतय्गु वाहुल्यता दुगु लागायात नं तामाङ्गतय्सं दावा यानाच्वंगु दुसा नेवाः स्वायत्त राज्यया न्ह्यलुवाःतय्सं रसुवा थ्यंक नं दावा यानाच्वंगु सीदु । थथ्य छगूहे प्रदेश दुने नं छु छु लागा दुथ्याकेगु व छु छु लागात त्वःतेगु धयागु खँ स्वयेवलय् आः थत्थेंहे स्पष्ट यायेमाःथें च्वंसां व्यवहारया थ्व उलि अःपुक्क व याउँक समाधान जुइगु खँ मखु । उकिं थुकियात हत्थासं निर्णय यायेगु स्वयाः लिपाया नितिं थाति तयाः वनेगु वांलाइ ।

अथ्यला संघीयता वइगु निश्चित जूथें नेवाः स्वायत्त राज्य वइगु थौं नं निश्चित जुइफूगु मदुनि । ज्यूसा संघीयताहे महयेगु व हल धाःसां नेवाः प्रदेशयात स्वीकार मयाइपिनिगु ल्याः थन म्हो मदु । नेवाः प्रदेश सुनिश्चित मजुयाच्वंगु धयागु नेवाःत अज्ज नं संगठित जुइमफयाच्वंगु व नेवाः राज्यया विरोधीत संगठित रुपं अले योजनावद्ध धंगं न्ह्यःने वयाच्वंगु दु । राजधानी प्रदेश यायेमाः धयावयाच्वंपिं नेपाली कांग्रेस थौं नं नेवाःतय्गु विरुद्धय् दु । कांग्रेसं नेवाः प्रदेशया विरोध यानाः राजधानी प्रदेशया प्रस्ताव हःगुया ल्यूने नेवाःतय्गु अस्त व्यस्त संगठन व नेवाःतय न्ह्यलुवाःतय्गु कृयाकलापया आधारय् कांग्रेसतय्गु लिस खः । नेवाः स्वायत्त प्रदेशया विरुद्ध राजधानी प्रदेशया प्रस्ताव धयागुहे नेवाः विरोधी भावना व विचाः खः कांग्रेसया । नेवाः विरोधी कांग्रेस पार्टी दुने च्वनाच्वनेगु धयागु हे आः नेवाःतय्गु नितिं लाज व शर्मया विषय जुइधुंकूगु दु ।

कांग्रेस दुने ब्रम्हु क्षेत्रीतय्गु समर्थन यायेगु व नेवाः स्वायत्त राज्यया विरोध यानाः धात्थेंला कांग्रेसं तःधंगु अपराध याःगु दु । जातीय राज्य मज्यू स्वीकार यायेफैमखु धाइम्ह नेपाली कांग्रेसं नेवाः स्वायत्त राज्यया विरोध यानाः यथार्थय् जातीयता, भाषा, पहिचान आदियात अपमान यायेगु ज्या याःगु दु । संघीयताया नामय् राज्यं ल्यूने लाका तःपिं फुक्क भाषा भाषी, जात जातियात मू मतःगुया प्रमाण खः थ्व । छु देशय् भाषा समस्या मदु ? छु जातीय समस्या मदु ? दु, तर दु धकाः नेपाली कांग्रेसथें याःगु प्रजातान्त्रिक धाइगु पार्टीं गवलेंहे स्वीकार याःगु मदु । उज्वःगु पार्टीयात धात्थे धाये माल धाःसा कट्टर ब्राम्हणवादी पार्टी खः ।

उज्वःगु पार्टी छु संनं नेवाः च्वनेमात्रं थःगु वेइज्जती यायेगु खः । गनतक्क सीमाना सम्वन्धी खँ दु, उकियात थातिइ तयाः थौं फुक्क आदिवासी श्रमजाति छथाय् च्वनाः छगू हे सः व छगूहे धिक्का जुया संघीयताया ग्यारेन्ति यानाः नेवाः व ताम्सालिङ्ग स्वायत्त राज्य वइगु सुनिश्चित यायेमाः । थुकिया नितिं माःगु दवाव मूलक संघर्षशील व आन्दोलित मनोस्थिति दयेके माः । सीमा सम्वन्धी खँ लिपा जक सहलह दयेकाः क्वछीगु यायेमाः ।

More Stories Like this