शीर्ष नेतातय्गु व एमालेया बैठक स्थगित
येँ (झीगु स्वनिगः)
प्रधानमन्त्री डा. बाबुराम भट्टराई नं आह्वान यानादीगु प्रमुख दलया शीर्ष नेतातय्गु म्हिगः बुधवाः च्वनेगु धयातःगु बैठक स्थगित याःगु दु । उगु बैठक थौं विहिवाः सुथय् ८ बजे जक च्वनीगु जूगु दु । बैठकय् संविधान निर्माणया झ्वलय् विवादीत जुयाच्वंगु शासकीय स्वरुप नापं सरकारया निर्णयया विषययात कयाः सहलह जुइ धाःगु दु । अथे हे एमालेया स्थायी समितिया म्हिगः बुधवाः हे च्वनेगु धयातःगु बैठक नं स्थगित जूगु दु । विद्यार्थी व युवा संगठनतपाखें मंकाः कथं स्वनिगः बन्द आह्वान याःगुलिं नेतात वये मफैगु जुयाः अथे बैठक स्थगित याःगु खः ।
एमालेया वइगु फागुन २१ गतेनिसें स्वन्हु तक ये“य् जुइगु राष्ट्रिय प्रतिनिधि परिषद्य् पेश यायेगु प्रस्तावयात अन्तिम रुप बिइगु नितिं धकाः पार्टीया केन्द्रीय ज्याकू बल्खुइ उगु बैठक सःतातःगु खःसा बन्दया कारणं यानाः स्थगित याःगु खः ।
