बन्दं यानाः मन्त्रीया राजीनामा थौं जक
येँ (झीगु स्वनिगः)
जिम्मेवारी मदुगुलिं धकाः राजीनामा बिइत धकाः स्वनिगः बन्द जूसां न्यासि हे वनाः सिंहदरवारय् वंम्ह विनाविभागीय मन्त्री रामलाल यादवं थौं विहिवाः जक राजीनामा बियादीगु जूगु दु । बन्दया कारणं प्रधानमन्त्री डा. बाबुराम भट्टराई सिंहदरवारय् उपस्थिति जुयाः मदीगुलिं विनाविभागीय मन्त्री यादवं थौं विहिवाः जक राजीनामा बिइगु जुइ धकाः संचारकःमितय्त जानकारी बियादीगु दु ।
थःगु म्हिचाय् हे राजीनामा पौ तयाः सिंहदरवारय् झायादीम्ह वय्कः सिराह निर्वाचन क्षेत्र नं. २ पाखें मधेशी जनअधिकार फोरमपाखें निर्वाचित जुयादीम्ह खः । वय्कः न्हय्ला न्ह्यः जक जेपी गुप्ताया मधेसी जनअधिकार फोरम गणतान्त्रिकय् दुहां वनादीगु खः ।
