स्वनिगः व पिनेया थीथी जिल्ला नं ठप्प

येँ (झीगु स्वनिगः)

पेट्रोलियम पदार्थय् भाः थकाःगु विरोधय् १३ गू विद्यार्थी संगठन व ९ गू युवा संगठनं मंकाः कथं म्हिगः बुधवाः आह्वान याःगु स्वनिगः बन्दं स्वनिगः नापं देय्न्यंकंया थीथी जिल्लाय् तकं जनजीवन प्रभावित जूगु दु । स्वनिगःया जनजीवन ठप्प हे जूगु दुसा स्वनिगः जःखःया जिल्ला नाप नापं मेमेगु जिल्ला तकं बन्द जूगु दु ।

विद्यार्थी व युवात यक्व ल्याखय् सतकय् क्वहां वयाः प्रदर्शन मयाःसां नं बन्द धाःसा सफल हे जूगु दु । विद्यार्थी व युवा संगठनया नेता व कार्यकर्तातय्सं म्हो जक मनूत जूसां सुथंनिसें स्वनिगःया थाय् थासय् प्रदर्शन याःगु खः । बन्द जुयाः स्वनिगःया शिक्षण संस्था, यातायात, कलकारखाना नापं पसःत तकं ठप्प जूगु दु । सतकय् मोटरसाइकल तकं चले जूगु खनेमन्त । छगू कथं स्वनिगः बन्द शान्तिपूर्ण हे जूगु दु । पेट्रोलियम पदार्थय् भाः थकाःगुलिं आम जनताया नं विरोध दु धकाः म्हिगः बन्द पूर्ण रुपं सफल जूगुलिं पुष्टि जूगु दु । बन्दया झ्वलय् प्रदर्शनकारीतय्सं स्वनिगलय् छगू दर्जन ट्याक्सी व मोटरसाइकल तोडफोड यानाः ब्यूगु दुसा चाबहिलय् छगः सवारी साधनय् मि तयाब्यूगु दु ।

थ्व हे दथुइ युवा व विद्यार्थी संगठनतय्सं सनिलय् ५ बजे लिपा बन्द ज्याझ्वः लितकाःगु खः । अथे हे थौं विहिवाः सुथय् ११ बजे विद्यार्थीतय्गु बैठक च्वनाः न्हूगु चरणया आन्दोलनया ज्याझ्वः तयार याइगु जूगु दु । काभ्रेय् नं बन्द जूगु दु । अन नं यातायात पुर्ण रुपं ठप्प जूगु दुसा पसः, शिक्षण संस्था तकं प्रभावित जूगु दु । बन्द जुयाः काभ्रेया जनजीवन पूर्ण रुपं प्रभावित जूगु दु । दाङय् नं बन्दं यानाः जनजीवन प्रभावित जूगु दु । जिल्ला दुने व पिने छुं नं कथंया सवारी सधारन चले मजुल । पूर्वपश्चिम राजमार्गया दाङ सतक पूर्ण रुपं ठप्प जुल ।

अथे हे जनकपुरय् नं सुथंनिसें हे जनजीवन प्रभावित जुल । नगर लागाय् उद्योग व पसः तकं बन्द जुल । शिक्षण संस्था बन्द जूगु दुसा यातायात साधन ठप्प जूगु दु । विद्यार्थीतय्सं प्रदर्शन याःगु दु । उगु हे कथं पर्वतय् नं बन्दं जनजीवन प्रभावित जूगु दु । धौलागिरी अञ्चलपाखे्रं वइगु यातायात ठप्प जूगु दु । अथे हे शैक्षिक संस्था, पसः तकं बन्द जूगु दु । सिन्धुलीइ बन्द आह्वानकर्तातय्सं यात्रुबाहक बस ना ४ ख २४२७ नम्बरया बस तोडफोड यानाः ब्यूगु दु । सदरमुकाम व वीपी राजमार्गय् तकं यातायात ठप्प जूगु दु । उगु हे कथं पर्वतय् बन्दया इलय् नं मोटरसाइकल गयाः वल धकाः मोटरसाइकल च्याकेत्यंपिं न्याम्ह विद्यार्थीतय्त प्रहरीं ज्वंगु दु । पोखरां बागलुङपाखे वनाच्वंगु मोटरसाइकल यात नेपाल विद्यार्थी संघया न्याम्ह – खुम्हेसित ज्वंगु खः ।