‘हदबन्दीया ख“ संविधासभाय् वनाः क्वःजिइ’

येँ (झीगु स्वनिगः)

एकीकृत नेकपा (माओवादी)या स्थायी समिति नेता देब गुरुङं जमिनय् हदबन्दी लागू यायेगु ला कि मयायेगु व हदबन्दीसिबें अप्वः दुगु जमिन सरकारं काइगु इलय् क्षतिपूति बिइगु ला कि मबिइगु धैगु सवाल संविधानसभाया पूर्ण मु“ज्यां जक क्वछिइगु अवस्था वःगु दु धकाः धयादीगु दु । संविधानसभाया विवाद समाधानया नितिं दयेकूगु उपसमिति व संवैधानिक समितिं थथे हे यायेगु धकाः निर्णय याये मफुगुलिं अज्वःगु अवस्था वःगु धकाः नेता गुरुङं जानकारी बियादीगु दु ।

वय्कलं उपसमितिइ संविधानया बारे सिबें नं अप्वः पिनेया ख“ जुइगु जूगुलिं महत्वपूर्णगु सवाल समाधान याये मफुगु खः धकाः धयादीगु दु । भूमिहीनया सवालय् शीर्ष नेतात हे माःगु कथंया गम्भीर मजूगु ख“ न्ह्यथसें नेता गुरुङं फुक्क दलया छुं छुं कानुनी सभासद्तसें नेतातय्त चाःहिइका च्वंगु खः धकाः नं धयादिल । हदबन्दी व क्षतिपूर्तिया सवालय् नं अथे जूगु खः धकाः वय्कलं स्पष्ट यानादिल । राष्ट्रिय भूमि अधिकार मञ्च नेपालं संविधानय् भूमि सुधार विषययात कयाः जूगु ज्याझ्वलय् न्वंवासें नेता गुरुङं अथे धयादीगु खः ।

कांग्रेसया नेता सुप्रभा घिमिरें जमिनया मुद्दायात शिक्षा, स्वास्थ्य, रोजगारनाप स्पापू दुगु ख“ न्ह्यथसें कांग्रेस भूमि सुधारया विपक्षय् मदु धकाः धयादिल । अथे हे श्याम श्रेष्ठं हदबन्दीसिबें अप्वः दुगु जमिनय् क्षतिपूर्ति बिइगु जुल धाःसा भूमिसुधारया अर्थ हे मदु धकाः धयादिल । प्राकृतिक स्रोत साधन समितिया सभापति शान्ता चौधरीं न्ह्याक्व हे छलफल याःसां नं नेतात जिम्मेवार मजूगुलिं समस्यां निकास काये मफुगु अवस्था ब्वलंगु खः धकाः धयादिल । एमालेया नेता प्रकाश ज्वालां थःगु पार्टी भूमिहीनया पक्षय् न्ह्याबलें दनाच्वनी धकाः धयादिल ।