‘द्वन्द्वकालया लिखितयात जक नालागु खः’
येँ (झीगु स्वनिगः)
प्रधानमन्त्री डा. बाबुराम भट्टराई नं द्वन्द्वकालया जनसत्तायात मान्यता बियागु मखुसे अबलेया लिखितयात सरकारं मानेयानागु जक खः धकाः धयादीगु दु । वय्कलं सरकारया निर्णय विरुद्ध जुयाच्वंगु विरोधयात कयाः दलतलिसे सहलह जुइ धकाः धयादीगु दु । नेपाल पत्रकार महासंघ पाल्पापाखें तानसेनय् ग्वसाःग्वःगु पत्रकार भेटघाट ज्याझ्वलय् न्वंवासें प्रधानमन्त्री भट्टराई नं अथे धयादीगु खः ।
वय्कलं थःगु नेतृत्वया सरकारं हे न्हूगु संविधान च्वयेगु व शान्ति प्रक्रियायात तार्किक निष्कर्षय् थ्यंकेगु जुइ धकाः नं स्पष्ट यानादिल । सरकारयात राष्ट्रिय सरकार दयेकेगु विषययात कयाः प्रमुख दलया नेतातलिसे नं सहलह जुयाच्वंगु दु धकाः नं वय्कलं दावी यानादिल । उगु पत्रकार सम्मेलनय् एकीकृत नेकपा (माओवादी)या नायः पुष्पकमल दाहाल प्रचण्ड, बरिष्ठ न्वकु मोहन बैद्य किरण नं उपस्थिति जुयादीगु खः ।
माओवादीया मगरात व तमुवान राज्य स्तरया अगुवा कार्यकर्ता प्रशिक्षण ज्याझ्वलय् ब्वति कायेत माओवादीया स्वम्ह हे शीर्ष नेतात उखेपाखे वनादीगु इलय् अथे पत्रकार भेटघाट यानाः प्रधानमन्त्री नापं माओवादीया न्वकु डा. बाबुराम भट्टराई नं अथे न्वंवानादीगु खः ।
