गिरिजाया थःहे मनूत रुष्ट

आः सुजाताया नेतृत्वय् देउवाया मन्त्रीत

यें (सन्ध्या टाइम्स) / कांग्रेस सभापति गिरिजाप्रसाद कोइरालां थः म्ह्याय् सुजाता कोइरालाया नेतृत्वय् पार्टीयात सरकारय् छ्वयेगु धकाः याःगु निर्णय महिलेगु खँ धयादीगु दु । थौं सुथय् थः समर्थित छुं नेतातलिसे खँ ल्हासें वय्कलं उगु अडान कयादीगु खँ कांग्रेस नेता खुमबहादुर खड्कां कनादिल ।

कोइरालां थः हे म्ह्याय् सुजाताया नेतृत्वय् सरकारय् वनेगु निर्णय यायेवं कांग्रेस दुने विवाद तच्वःगु खः । कोइरालाया थ्व निर्णयया विरोधय् कार्यवाहक सभापति सुशील कोइराला उपसभापति रामचन्द्र पौडेल व वरिष्ठ नेता शेरबहादुर देउवां असन्तोष प्वंकेधुंकूगु दु ।

म्हिगः कांग्रेसया उपसभापति महामन्त्री नापं खुम्ह नेतात वनाः कोइरालायात थःपिनि निर्णय हीकेत इनाप याःगु खः । तर कोइरालां उकियात अस्वीकार यानादिल ।

नेतातय् थ्व असन्तुष्टि बारे सहलह यायेत थौं कोइरालां सुशील कोइराला रामचन्द्र पौडेल व शेरबहादुर देउवायात थःगु छेँय् सःतादीगु खः । तर वय्कःयात नापलायेत देउवा छम्ह बाहेक मेपिं नेतात धाःसा मवं ।

कोइरालां निर्णय हीकीगु संकेत मवयेवं असन्तुष्ट नेतात वय्कःयाथाय् मवंगु खः । कोइरालाया छेँय् वनेगु पलेसा सुशील कोइराला व रामचन्द्र पौडेल निम्हं जुम्लाय् हत्या जूम्ह कांग्रेस महासमिति दुजः उमाकान्त हमालया झिंस्वन्हुया ज्याझ्वलय् ब्वति कायेत उखे वनाछ्वःगु दु । वय्कःपिंसं थौं कोइरालां सःतूगु बैठकयात बहिष्कार यानागु मखु वय्कलं निर्णय हीकेगु संकेत मबिउगुलिं मवनागु जक खः धाःगु दु ।

सुशील व रामचन्द्र थः खनाः तम्वयेवं कोइरालां आः मेम्ह नेता शेरबहादुर देउवालिसे सहमति दयेकाः न्ह्याः वनेगु तयारी यानाच्वंगु खँ सूत्रं धाःगु दु । देउवायात नापलानाः कोइरालां सुजातायात विरोध याये मते बरु देउवाया कलाः आरजुयात नं मन्त्री दयेका बी धकाः प्रस्ताव तःगु खँ सूत्रं धाःगु दु । तर देउवां आरजुयात मन्त्री दयेकल धाःसा थम्हं हे विरोध याये धासें उकियात समर्थन मयाःगु खः । बरु उकिया पलेसा न्हापा थःत साथ बिउपिं पूर्व प्रजातान्त्रिक कांग्रेसया नेतातय्त मन्त्री दयेकल धाःसा थः नं कोइरालायात ग्वाहालि यायेत तयार दु धायेवं कोइरालां उगु प्रस्तावयात धाःसा स्वीकार याःगु खँ धाःगु दु ।

सूत्रतय्सं धाः कथं देउवालिसे हे सहलह जू कथं आः कोइरालां सुजाता बाहेक मेपिं न्याम्ह मन्त्री जुइपिनि नां नं तयार याःगु दु । उकी डा. प्रकाशशरण महत डा। मिनेन्द्र रिजाल बालकृष्ण खाँड पूर्णकुमार सेर्मा व उमाकान्त चौधरीया नां दुथ्यानाच्वंगु दु । वय्कःपिं न्याम्ह पुलांगु प्रजातान्त्रिक कांग्रेसया नेतात खः । कोइरालां थौं थ्वहे नां प्रधानमन्त्रीयात बीगु तयारी यानादीगु खँ नं धाःगु दु ।