नेवाः-ताम्सालिङ वार्ता विफल
येँ (सन्ध्या टाइम्स)/नेवाः प्रदेश व ताम्सालिङ प्रदेशया लागा निर्धारण यायेगु लागिं निगुलिं जातिया विज्ञत च्वनाः न्ह्याकूगु वार्ता विफल जूगु दु। नापं लाःगु थ्व निगू प्रदेशया सीमा निर्धारणय् वयाच्वंगु विवाद समाधान यायेत निगुलिं जातिया विशेषज्ञत च्वनाः वंगु छुं न्हि न्ह्यवंनिसें वार्ता न्ह्यानाच्वंगु खः। तर निगुलिं जातिया प्रतिनिधितय्सं थःपिंसं दावी यानाच्वंगु लागा त्वःते मफइगु अडान कायेवं वार्ता न्ह्यःने वने मफुगु खँ वार्ताय् दुथ्याःम्ह छम्ह नेवाः प्रतिनिधिं 'सन्ध्या टाइम्स'यात कनादिल ।
वार्ताय् छुं हे प्रगति जुइ मफयेवं निथ्वःसिनं राज्य पुनर्संरचना आयोगं छु प्रतिवेदन बी उकियात हे स्वीकार यानाः न्ह्याः वनेगु जुइ धासें वार्ता भंग याःगु खः।
सूत्रं बिउगु जानकारी कथं वार्ताय् तामाङ प्रतिनिधितय्सं भ्वँत, धौख्यः थेंज्याःगु नेवाः बहुल लागा तकं दावी याःगु खःसा नेवाःतय्सं रसुवा तकया लागा दावी याःगु खः। नेवाः प्रदेशयात ताम्सालिङपाखें घेरे मयाकेगु कथं सीमा निर्धारण यायेमाः धकाः नेवाः प्रतिनिधितय्सं इनाप याःगु खःसा तामाङ प्रतिनिधितय्सं 'अखण्ड ताम्सालिङ' धइगु नारा बियाः नेवाः प्रदेशयात ताम्सालिङ दुने हे लाकेत स्वःगु खँ धाःगु दु। लिसें उमिसं येँया बौद्ध लागाय् नं तामाङतय्गु बाहुल्यता दुगुलिं अन समेत थःपिनि प्रशासन दयेमाः धकाः दावी याःगु खः ।
नेवाः प्रतिनिधितय्सं मल्लकालय् तत्कालिन नेवाः राज्यं चीनलिसे सन्धि याःगु व भारतलिसे खुल्ला व्यापार याःगुलिं नेवाः प्रदेशया लागा चीन व भारतलिसे स्वाःगु खनेदु धइगु तर्क तःगु खः ।
नेवाः व तामाङया जनसंख्या छगू लाखं जक पाःसां भूमि धाःसा नेवाःयात ९०० वर्गकिमि व तामाङयात १०,००० वर्गकिमि बियातःगुलिं असमान जुल धइगु सः थ्वयाच्वंगु दु ।
