लोडशेडिङं लः आपूर्तिइ नं समस्या
येँ (सन्ध्या टाइम्स)/सुथय् बहनी अप्वयेकूगु लोडशेडिङं यानाः लःया आपूर्तिइ तकं समस्या पिहां वःगु दु। छेँय् छेँय् मोटरं लः साले माःपिंत मत मवयाः समस्या जुइगु ला द हे दु, उकिया नापनापं लः आपूर्ति याइगु निकाय काठमाडौं उपत्यका खानेपानी लिमिटेडयात नं मेशिन चले यानाः भूमिगत लः सालेत समस्या जुयाच्वंगु खँ धाःगु दु। छखे सुक्खा यामय् मुहानय् लः हे म्हो जुइगु व मेखे दुगु लः सालेत नं मत मवयाः मेशिन चले याये मफयाच्वंगु खँ धाःगु दु ।
स्वनिगःयात न्हिं ३२ करोड लिटर लः आपूर्ति यायेमाःथाय् थौंकन्हय् १३ करोड लिटर जक आपूर्ति याये फुगुलिं उपभोक्तायात मार लानाच्वंगु दु ।
उखे लःया हाहाकार जुयाच्वंगु इलय् निजी क्षेत्रया ट्यांकर सेवातय्सं लःया आपूर्ति यानाच्वंसां उमित गुणस्तर मगाः धकाः प्रशासनं कायल यानाच्वंगु खँ ट्यांकर व्यवसायी संघया नायः विष्णु दहालं कनादीगु दु। थाय्थासय् गुणस्तर परीक्षण यानाः लःयात पनीगु जुयाः थौंकन्हय् व्यवसायीतय्सं ट्यांकरय् 'खानेपानी' धकाः च्वयातइगुली आः 'खाने' आखःयात हुयाः 'पानी' जक च्वयेगु याना हःगु दु ।
