दलित नं जातीय राज्यया पक्षय्

येँ (सन्ध्या टाइम्स)/जातीय राज्यया तच्वयेक विरोध जुयाच्वंगु इलय् दलित समुदाय नं थ्वहे पक्षय् खने दयेकः वःगु दु। दलित हकअधिकारया लागि क्रियाशील जुयाच्वंगु थ्यंमथ्यं स्वसःगू संस्थाया कुसा संगठन दलित गैरसरकारी संस्था महासंघं नकतिनि हे थ्व माग याःगु खः। महासंघया अध्यक्ष गजाधर सुनारं थःपिंसं राज्य पुनर्संरचना आयोगय् थुकिया बारे मागपत्र नं लःल्हायेधुनागु जानकारी बिउगु दु। महासंघं जातीय राज्य धकाः तप्यंक मधाःसां दलित संघीय प्रान्त जुइमाःगु माग याःगु दु। 'दलितया पहिचान व पहुँच स्थापित जुइकथं भौगोलिक रुपं राज्यया पुनर्संरचना यायेमाःगु जिमिगु माग खः' सुनारं धयादिल । मेगु जातिया जक माग पूवंकेगु कुतः यानाः दलिततय्त लिउने लाकेगु कुतः जुयाच्वंगु दु। उकिं न्यायोचित रुपं दलित संघीय प्रान्त जुइमाःगु खँ नं वय्कलं कनादिल ।