छाय् जुइ थपाय्जिगु अपराध?

सशस्त्र प्रहरीया डीआईजी रंजन कोइरालां थः हे कलाःयात विभत्स ढंगं स्यानाः नं तःन्हु तक गुपचुप यानातःगु घटना सार्वजनिक जुइवं देय्न्यंकं सनसनी मच्चे जूगु दु। सशस्त्र प्रहरीया डीआईजी थेंज्याःगु उच्चपदय् च्वंम्ह मनुखं थज्याःगु जघन्य अपराध याःगु घटनां न्यंपिं फुकसिया चिम्सँ तिंतिंस्वाःगु दयेमाः। प्रहरी सेवा अथें नं सर्वसाधारणया सुरक्षा याइगु निकाय खः। अज्याःगु निकायया सुं उच्च अधिकृत थम्हं हे सुयां हत्या थेंज्याःगु अपराध याइ धकाः कल्पना तकं याये फइगु विषय मखु। तर रंजन कोइरालां याःगु थ्व कर्तूतं अज्याःगु सम्पूर्ण कल्पनायात भंग याना बिउगु दुसा उकिया नापनापं प्रहरीया स्वच्छ छबीइ नं छकूचा हाकुगु दाग किका थकूगु दु। नेपाःया सुरक्षा निकाय दुने थज्याःपिं अपराध मनोवृत्तिया मेपिं गुलि मनूत दइ तिनिगु खः धइगु त्रास समेत थुकिं ब्वलंका बिउगु दु। थ्व घटनां देय्या सुरक्षा निकायत अवश्य नं झस्के जूगु दयेमाः ।

कोइरालाया थ्व अपराध लिपा समाजय् थज्याःपिं अपराधीत छाय् जन्म जुइ व छाय् थज्याःगु अपराध याना जुइगु खइ धकाः मनोवैज्ञानिक विश्लेषण नं जुल खइ। तर थ्व घटनाया लिउने सुलाच्वंगु कलाःभाःतया कचवं व उगु कचवं ज्यंकेगु सवालय् पिहां वःगु कानुनी जटिलतां नं थज्याःगु अपराध यायेमालीगु 'बाध्यता' सिर्जना जूगु सन्दर्भयात थुथाय् लुमंकेमाःगु खनेदु। वंगु छुं ई न्ह्यः तिनि नेपाःया कानून मिजं स्वयां मिसापिंप्रति अप्वः लचक जूगु व उकिं यानाः मिजंत पीडित जुइमाःगु खँ चर्चाय् वःगु खः। थज्याःगु जटिलतायात कानूनं निकास मबिल धाःसा लिच्वः अपराध जूवनीगु दसु नं थुकिं बिउगु तायेकेमाःगु खनेदु ।

More Stories Like this