जनसत्ताया निर्णय जनताया हे पक्षय् : मन्त्री रायमाझी

येँ (झीगु स्वनिगः)

स्थानीय विकासमन्त्री टोपबहादुर रायमाझीं द्वन्द्वकालय् जनसत्तां याःगु छेँ बुँ सम्बन्धी निर्णय जनताया पक्षय् दुगुलिं उकियात मेगुकथं मकायेत प्रक्षिपक्षी दलतय्त इनाप यानादीगु दु । रिपोर्टर्स क्लबपाखें सोमवाः ग्वसाः ग्वःगु छगू ज्याभ्mवलय् वय्कलं द्वन्द्वकालय् आमजनता सदरमुकामतक्क वनाः जग्गा न्याये मीगु, कर पुलेगु व रजिष्ट्रेसन पास यायेगु ज्या यायेमफइगु स्थिति जूगुलिं उकियात जनताया हे सहजताया नितिं जनसत्तां याःगु निर्णय जनहित अःखः मजूगु स्पष्ट यानादीगु खः ।

थ्व इलय् व्यवस्थापिका–संसदय् दुगु प्रमुख प्रक्षिपक्षी दल नेपाली कांगे्रस व नेकपा (एमालें) जनसत्तां याःगु निर्णययात मन्त्रिपरिषद्ं मान्यता ब्यूगुलिइ विरोध यायेगुया छु नं तुक मदु, मन्त्री रायमाझीं धयादी – ‘संसद अवरुद्ध यायेगु उमिगु अडान दूरदर्शी मदु ।’ थ्व इलय् मूल्यवृद्धिया विरोधय् विद्यार्थीं याःगु आन्दोलन जायज जूसां नं थःगु हे पार्टीया भ्रातृसंस्था अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) नं उगु आन्दोलनय् कुहांवयेगु बाध्यता जक जूगु वय्कलं बिचाः प्वंकादीगु खः ।

कानुनमन्त्री बृजेशकुमार गुप्तां न्हापाया जनसत्तां याःगु निर्णययात सदर यायेगु मन्त्रिपरिषद् थःगु निर्णययात लित कायेगु निष्कर्षय् थ्यनेधुंकूगु धयादिल । वय्कलं सरकारं थ्व निर्णय यायेबलय् थः मन्त्रिपरिषद्या बैठकय् मदुगु व कानुनमन्त्रीया हैसियतं अज्याःगु निर्णय यायेबलय् समस्याबारे थःम्हं जानकारी बिइक बिइकं नं मन्त्रिपरिषद्ं पारित यायेवं आः समस्या वःगु धयादिल । मन्त्री गुप्तां धयादी – ‘मन्त्रिपरिषद्या थ्व निर्णयपाखें थ्व इलय् शान्ति व संविधान हे धरापय् लाइकथं संसद अबरुद्ध जुयाच्वंगुलिं थ्व निर्णय याकनं लित कयाः निकास बिइमाः ।’