रक्षक हे भक्षक

सशस्त्र प्रहरी नायव महानिरिक्षक (डिआइजी) रञ्जन कोइरालां थःहे कलाः गीता ढकालया ग्यानापुक्कहे स्याना व्यूगु दु । पालुङ्गय् सीम्ह कलायात च्याकाः लिहां वयाच्वंगु इलय् नागढुङ्गा सुथसिया ९ वजे म्हीग डिएसपी कोइरालायात ज्वनाः हलुमान ध्वाखाय् न्यँनेकने यायेवं डिएसपी कोइरालां थःम्हं कलाःयात स्यानागु खँ स्वीकार याःगु खः । अभियुक्त कोइरालाया चरित्र न्हापांनिसेंहे शंकास्पष्ट व अपराध प्रवृधियाम्ह खः । थ्वहे कारणं डिएसपी कोइरालां थौं स्वयाः झिंच्यादँ न्ह्यः इहिपाः जूगुया छुं दँ लिपाहे ल्वापु जुइगु जुल । निम्ह काय्पिं दयेवं वंगु न्यादँ न्ह्यः कलाः भात निम्हं व्यागलं च्वनावयाच्वंगु खः । कोइरालाया पिनेहे निम्ह अलग अलग कलाः तयातःगु व थ्वहे कारणं कलाःम्ह भाःत नाप मच्वसे अलग च्वनाच्वंगु खः । निम्ह मस्तमध्ये नं तःधिकःम्ह कोइरालानाप व कान्छाम्ह ढकालनाप च्वनावयाच्वंगु खः । थुया लिपा कलाःम्ह ढकालं येँ जिल्ला अदालतय् सम्वन्ध विच्छेदया मुद्दा तयाः मानाचामल नं भरे याकल । कोइरालाया न्याखा छेँय् मध्ये वुढानिलकण्ठया छेँ कलाःम्हय्सित व लच्छिया न्याद्वः दां नं कलाःम्हय्सित वीमाःगु अदालतं आदेश विल ।

थुया लिपा दच्छिया नितिं चिनय् तालिम काःवम्ह कोइराला छुं ला न्ह्यः नेपाः लिहां वल व वंगु पुस २७ गते आपुलुखं थः कलाया थाय् तयातःम्ह कान्छाम्ह काय्यात कोइरालां ब्वनायंकल । थ्व खँ गितां थः मांबौयात उखुन्हु सनिलय् खवर व्यूगु खः । थुयालिपा गिताया मां बौंनं फोनया वलय् गिता सम्पर्कय् मवल । गिताया मां बौपिं उघ्रिमय् प्रहरी प्रसाशनयात खवर यात, निवेदन तयेत स्वल । तर प्रहरीं प्रमाण मगाः धाधां निवेदन तर्क दर्ता मयाः । सम्वत् उखुन्हु बहनि, कोइरालां थः निम्ह पिने तयातःपिं कलाः, व दाजुया ग्वाहालि कयाः गिताया विभत्स हत्या यानाविल । शरीरयात कुचा कुचा यानाः तेस्तुङ्गपाखे यंकाः च्याकाः विल ।

थुलि विभत्स हत्या याये धुंकाः नं कोइरालां सहिद गंगालाल अस्पतालय् वासः याकेत भर्ना जूवंगु खः । प्रहरी परिसरया प्रमुख राजेन्द्र श्रेष्ठ कोइरालाया पासा जूगुलिं गिताया छेजःपिनिगु निवेदन मकाःगुया नापनापं मेमेगु खँय् नं ग्वाहालि मयाःगु खनेदु । थुखे गिता वेपत्ता उखे प्रहरीया असहयोगं अज्ज रहस्यमय यानावीवं सर्वसाधारण जनता व नागरिक समाजया ध्यान नं थुखेपाखे वन । गीताया छेँयापिसं हलुमान ध्वाखाय् हे कोइरालायात सःताः खँल्हायेगु प्रस्ताव न्ह्यःने तयेवं प्रहरी सहमति जुल व कोइरालायात सःताः खँल्हायेगु झ्वलय् कोइरालां गिता सुचुका तयागु थाय् थःम्हं स्यूगु थःम्हं ब्वनाहये धकाः बचं विल । थुया लिपा निगू पक्षं थःथःगु छेँय् लिहां वन । थःम्हं स्याये धुंकूम्ह कलाःयात जिं ब्वनाहये धकाः प्रहरी परिसरय् कोइरालां छाय् बचं व्यूगु खः धायेमफु । थुकिया कन्हय् खुन्हुहे कोइरालायात प्रहरी याःगु नियन्त्रणय् काःगु खः ।

डिएसपी कोइरालाया थुगु अपराधं रक्षक हे भक्षक जूगुला दहे दु नापनापं म्हस्यूगु व परिचित व्यक्तिया विरुद्ध प्रहरी परिचालन यायेत वा याकेत थाकूगु खँ नं न्ह्यःने वःगु दु । डिएसपी कोइराला प्रहरी परिसरया प्रमुख राजेन्द्र श्रेष्ठया पासा जुइवं प्रहरीं ग्वाहालि मयाःगु जक मखु निवेदन छगू नं दर्ता मयाःगु मकाःगु खँ प्रहरी प्रशासन दुने भनसुन व नाताकुतुम्हयाहे हैकम चलय् जुयाच्वंगु स्पष्ट जुइ । मदुम्ह गीता ढकालया थःथिति, नागरिक समाज व समाज सेवीत न्ह्यःने मवःगु खःसा थ्व घटनाया थुलि याउँक क्वमचाइगु खनेदु । अपराधयात अपराध कथं मकासे फयांफक्को सामसुम यायेगु, त्वपुइगु व थः मनूयात वचय् याकेगु पाखे प्रहरी प्रशासनया मनोस्थितिं प्रहरी जनताया सुरक्षाया नितिं धायेगु स्वयाः थःथितितय्गु सुरक्षा बीत जक च्वनाच्वंगु मखुला धयागु न्ह्यसः थनेगु यानाहःगु दु ।

दकले चिउताःया विषयला छु धाःसा प्रहरीतय्गु चरित्र प्रति धुक्क च्वनेमज्यूगु व जनताया सुरक्षाया ज्या त्वःताः थःयात मयःपिं मनूत स्यायेत उद्धत्त मनस्थितियात वालेमाःगु खँ न्ह्यःने हःगु दु । डिएसपी जुयाःनं दुम्ह कलाःयात त्वःताः निम्ह निम्ह गर्लफ्रेण्डपाखे भुलय् जुइगु, पोखराम्ह मनू जुयां नं येँय् न्याखा न्याखा छेँ दनेगु लगायत खँ अनुसन्धान घेराय् तयातयेमाःगु खः । तर थुखेपाखें ध्यानमवीगु थुज्वःगु कथंया जघन्य अपराध जुइगु खः ।

More Stories Like this