संवैधानिक समितिया बैठक – विवादित विषयत हल यायेगु निर्णय
येँ (झीगु स्वनिगः)
संवैधानिक समितिया आइतवाः च्वंगु बैठकं राजनीतिक दलतय्गु दथुइ सघन सहलह यानाः संविधान निर्माणया भ्mवलय् खनेदुगु विवादया विषयत हल यायेगु निर्णय याःगु दु । सिंहदरबारय् च्वंगु बैठकं संविधान निर्माणया भ्mवलय् लिपांगु इलय् खनेदुगु शासकीय स्वरुपया विवादया सम्बन्धय् छगू मत कायम यायेगु व संविधान निर्माणया ज्याय् गति बिइगु निर्णय जूगु एकीकृत नेकपा (माओवादी)या नायः पुष्पकमल दाहालं धयादीगु दु ।
वय्कलं धयादी – ‘संविधान दयेकीमखु धकाः गुकथं हुइना भुइना याःगु दु, उकियात पनेगु नितिं नं दलत छधी जुयाः न्ह्यःने न्ह्यायेगुया विकल्प मदु ।’
इलय् हे संविधान दयेकी, आः राजनीतिक दलतय्गु दथुइ सघन सहलहया प्रक्रिया थौंनिसें हे न्ह्याइ बैठकलिपा दाहालं धयादीगु खः ।
आइतवाःया बैठकय् दलतय्गु दथुइ खनेदुगु कचवंयात गुकथं हल यायेगु धइगु सम्बन्धय् सहलह जुल नेपाली कांग्रेसया संसदीय दलया नेता रामचन्द्र पौडेलं धयादीगु खः । थौं विवाद हल यायेगु स्वयाः नं छु प्रक्रियाया आधारय् संविधान निर्माणया ज्या न्ह्यःने न्ह्याकेगु धइगु सम्बन्धय् हे सहलह केन्द्रित याःगु नेता पौडेलं जानकारी बियादीगु खः ।
वय्कलं धयादी – ‘संविधान छु सिद्धान्तया दयेकेगु धइगु पक्का मजूत्तले संविधान दयेके फइमखु ।’ नेता पौडेलं एकीकृत माओवादीं नं पूँजीवादी संविधान दयेकेगु धइगु खँ स्वीकार यायेगु तर राजनीतिक दस्तावेजय् छगू दलीय संविधान दयेकेगु धइगु विषय तःगुलिं खँ क्वःजिइ मफुगु धयादीगु दु ।
शासकीय स्वरुपय् नेपाली कांग्रेसं हे पंगः थंगु मखुला धइगु सञ्चारकःमिपिनिगु न्ह्यसलय् नेता पौडेलं धयादी – ‘माओवादी प्रष्ट जुयाः वःसा, राष्ट्रपति व प्रधानमन्त्री निगुलिं दइगु व निम्हसिया नं अधिकार क्षेत्र किटान यानाः न्ह्यःने न्ह्यायेत तयार दु ।’
नेकपा (माले)या नायः लिसे सभासद् सिपी मैनालीं तःधंगु दलया कचवंया हुनिं संविधान दयेके मपूmगु धयादिसें चीधंगु दलं थौंया बैठकय् सःतःगु धयादीगु खः । वय्कलं धयादी – ‘तःधंगु दलत संविधान निर्माणय् सक्रिय मदु धइगुलिइ जिपिं चीधंगु दल स्पष्ट जुया, थ्व खँ आः जिमिसं जनताया दथुइ यंकेगु जुइ ।’
एकीकृत माओवादी पार्टीया नायः पुष्पकमल दाहाल, नेकपा (एमाले) या वरिष्ठ नेता माधव नेपाल लगायतया नेतातय्सं सहलह यानाः चीधंगु दलतलिसे स्वीछगू दलया बैठक तयेगु व उकियापाखें हे सामान्य बिचाः दयेकाः संविधान निर्माणय् वनेगु धयादीगु दु ।
