गच्छदारं भारतया दलाली यात

नेपाःया उपप्रधान लिसें गृहमन्त्री जुयाच्वंम्ह विजय गच्छदारं भारतया भ्रमणया इलय् थःगु मर्यादा व हैसियतया विपरित आचरण क्यनाः भारतय् थःगु जक मखु नेपाली आधिकारिक व्यक्तित्वया इज्जत लिलाम याकाः वःगु दु । नेपाली मन्त्रीत थःगु मान मर्यादा, इज्जतया नं वास्ता मयाइपिं जक मखु, माल धाःसा न्हासं बँय् चुइत नं लिफः स्वइमखु धयागु खँयात गृहमन्त्री गच्छदारं पुष्टी यानाव्यूगु दु । मधेसी मोर्चाया प्रमुख नेता नं जुयाच्वंम्ह विजय गच्छेदारं राज्यमन्त्री सरहया भारतीय राष्ट्रिय सुरक्षा सल्लाकार शिवशंकर मेननयात नाप लायेत वंगु विहिवाः वयकःयाहे ज्याकुथिइ वनाः छघौ नाप लायेगु ज्या जुल । याकः याकः नापलानाः छु छु खँ जुल धयागु नं स्पष्ट मजू । थ्व सिष्टाचार मर्यादाया पूर्णत अःखः खः ।

सिष्टाचार, मर्यादायात उपप्रधान व गृहमन्त्रीया पदय् च्वनाच्वंम्ह गच्छेदारं पालन यायेफूगु खनेमदु । थः स्वयाः क्वय्या तहया सुंनं व्यक्तियात नाप लायेहे मज्यू । वनं उज्वःपिनिगु ज्याकुथिइ वनाः झनहे मज्यू । अथ्य मज्यूगु ज्या यानाः नेपाःया उपप्रधान मन्त्रीथें याःम्ह व्यक्ति थुगुकथं सिष्टाचार मर्यादाया अःखः ज्या यातकि भारतं नं भविश्यय् उगुहे कथं व्यवहार क्यनेत वेर मदु । वंगु प्रधानमन्त्री डा. बाबुराम भट्टराईया दिल्ली वं वलय् भारतीय प्रधानमन्त्री डा. मनमोहन सिंह थःहे विमान स्थलय् वयाः लसकुस यायेगु पल्सा सिष्टाचार महापाल रुचिरा काम्वोजयात जक छवयाः स्वागत याःगु खः ।

उपप्रधान लिसे गृहमन्त्री न्हू दिल्ली वनाः माःमाःगु जक खँ मल्हासे चिनिया प्रधानमन्त्री वेनया नेपाः भ्रमणया इलय् छु छु यात, छु छु खँ जुल, छु छु सन्धि सम्झौता यात, सु सु नाप लात धकाः रिपोटिङ्ग यायेगु ज्या जुल । थ्व नेपाःया नितिं तसकं लज्जास्पद खँ खः । निगू देश दथ्वीया खँ स्वंगूगु देय् भारतयात ब्रिफिङ्ग यायेगुया उदेश्य छु ? थ्व ला भारतया तप्यंकहे दलाली यायेगु ज्या जुल । भारतं न्यंसां ला कन्हे मज्यूम्ह गच्छेदारं विना प्रश्न व इनापहे याःसां ला कनेमज्यू गच्छेदारं विना इनाप व विना प्रश्न गच्छेदारं थः मालिकया न्ह्यःने नोकरं रिपोर्ट यायेथें सविस्तार कनाः निम्न स्तरया चरित्र व व्यवहार क्यनेगु ज्या जूवन । विशेष यानाः चीनया प्रधानमन्त्री वेनं तिब्बती शरणार्थीतय्गु वारे याःगु इनापयात छगः छगः शब्द गथ्य नवात अथ्यहे कनाः गच्छदारं छम्ह उपप्रधानमन्त्री कथं मखु, भारतया लहिनातःम्ह दलालया रुपय् प्रस्तुत जुल ।

न्हू दिल्लीइ वंम्ह गृह मन्त्री विजय गच्छदारं परराष्ट्र मन्त्रालय व न्हू दिल्ली च्वंगु नेपाली दूतावासयात पूर्व जानकारीहे मविसे थः यत्थे नाप लाः वनेगु ज्या जुल । थ्व खँ दकले शंकास्पष्ट व नेपाःया हित विपरित खँ खः । नेपाःया सुंनं पदाधिकारी व संवैधानिक पद धारण याइम्ह व्यक्ति सुं नं विदेशीत थःयत्थे व याकःचा वनाः नाप लाये मज्यू । कुटनियत आचार सहिता दुने लाःगु थुगु खँयात विजयकुमार गच्छदारं वास्ता मयाःगु खनेदु । मसीक याःगु जुइमा वा सीकाः थ्व देशया नितिं गम्भीर विषय खः । विदेशय् जूसा थुगु कथंया लापर्वाही जुल धाःसा उज्वःम्ह मन्त्रीया राजिनामा काइ । तर थन गच्छदारयाके राजिनामा कायेगु ला खँहे छख्य न्ह्यसः तक्क नं सुनां न्यनीमखु ।
गच्छदारया न्हू दिल्ली भ्रमणया दकले आपत्ति जनक खँ धयागु वयकः नं सुपुर्दगी सन्धि याकनं यायेगु धकाः न्हू दिल्लीयात आश्वासन वियावःगु दु । न्हू दिल्लीं याकनं सुपुर्दगी सन्धि यायेमाल धायेवं गृहमन्त्रीं लिफ न्ह्यफ हे मस्वसे याकनं हे सुपुर्दगी सन्धि यायेगु थुकिया निति माःगु प्रकृया न्ह्याकेगु वचन वियावःगु दु । वयकः नं थ्व खँ ल्हायेत सुनां अनुमति विल ? प्रधानमन्त्री डा. बाबुराम भट्टराईं व्यूगु जूसां व नेपालय् लागू जुइगु अवस्था मदु । भारतया दलालतय्गु पाखें न्ह्याक्को हे तयारी यानाः भारतयात लय्तायेकेगु ज्या जूसां देशघाती सुपुर्दगी सन्धि नेपाली जनताया गवलें नं स्वीकार्य जुइमखु । थ्व भारत व उया दलालतय्सं इलय्हे बांलाक थुइकेगु बांलाइ ।

More Stories Like this