नेवाः मोर्चा तछ्यायेगु कथं गतिविधि
येँ (झीगु स्वनिगः)
एकीकृत नेकपा (माओवादी)या जातीय मोर्चा एकीकृत नेवाः राष्ट्रिय मुक्ति मोर्चा नेपाःयात तछ्यायेगु कथंया गतिविधि माओवादीया नायः प्रचण्ड पक्षया नेवाः नेतातय्सं यानाहःगु दु । म्हिगः आइतवाः जक एकीकृत नेवाः मोर्चाया नायः दिलबहादुर श्रेष्ठया नां तयाः पार्टीया नायः पुष्पकमल दाहल प्रचण्डयात मूपाहां दयेकाः सहलह ज्याझ्वः याःगु दु । नेवाः मोर्चाया मूछ्याञ्जे, छ्याञ्जे नापं यक्व हे पदाधिकारी व केन्द्रीय दुजःतय्सं मसीक प्रचण्ड पक्षधरया नेवाः नेतातय्सं एकपक्षिय कथं ज्याझ्वः यात धकाः धाःगु दु ।
पार्टी दुने लाईन संघर्ष जुयाच्वंगु नापं कार्यक्रमिक एकता यानाः वनेगु धकाः सहमति जुयाः शीर्ष नेतात तकं छप्प“ जुयाः वनाच्वंगु अवस्थाय् प्रचण्ड पक्षधरं अथे नेवाः मोर्चाया नामय् गतिविधि याःगु धैगु नेवाः मार्चायात तछ्यायेगु कथंया गतिविधि खः धकाः मनूतय्सं विश्लेषण यानाः हःगु दु । थ्व हे दथुइ उगु ज्याझ्वःयात गुटबन्दी जुल धकाः नेवाः मोर्चाया यक्व हे नेता व कर्याकर्तातय्सं बहिस्कार तकं याःगु खः । नेवाः मोर्चाया च्याम्ह केन्द्रीय पदाधिकारीपिं मध्ये छम्ह उपाध्यक्ष व छम्ह सचिव जक उपस्थिति दुगु म्हिगः आइतवाःया उगु ज्याझ्वलय् मूपाहां प्रचण्ड, नेवाः जागरण मञ्चया सुजिव बज्राचार्य, नेवाः देय् दबूया धर्मशोभा तुलाधरपिन्सं न्वंवानादीगु खःसा ज्याझ्वः उमेश स्थापितं न्ह्याकादीगु खः ।
