'जातिय मुक्तिया खँय् कम्प्रोमाइज जुइमखु'
एकीकृत नेकपा (माओवादी)या नेतृत्वं जातिय स्वशासन नापं अत्मनिर्णयया अधिकारया विषय त्वःतुगु खँ पिहांवयाच्वंगु इलय् माओवादी नायः पुष्पकमल दाहाल 'प्रचण्डं' जातिय मुक्तिया खँय् माओवादीं कम्प्रोमाइज मयाइगु खँ धयादीगु दु ।
'जातिय स्वशासन व अत्मनिर्णयया अधिकारया खँ माओवादीया पहिचान खः, थुगु मुद्दाय् माओवादी छुं नं हालतं कम्प्रोमाइज यायेत तयार मदु' प्रचण्डं धयादिल, 'जिं थ्व हे मञ्जं धाये माओवादीं थ्व मुद्दा छुं नं हालतं त्वःतिमखु ।'
नेवाः राष्ट्रिय मुक्ति मोर्चां आइतवाः येँय् ग्वसाःग्वःगु 'नेपाःया राजनैतिक बिस्कं ई व नेवाः स्वायत्त राज्यया सुनिश्चितता' विषयसं सहलह मुँज्यायात सम्बोधन यानादिसें वय्कलं नेवाः स्वायत्त राज्य प्रति माओवादी प्रतिबद्ध दुगु तर प्रतिक्रियावादी व यथिस्थितिवादीत जातिय मुक्तिया विरोधय् वयाच्वंगुलिं नेवाः स्वायत्तता नापं जातिय स्वशासन खतराय् दुगु धयादिल ।
वय्कलं धयादिल, 'आःया अवस्था उपलब्धीपूर्ण व हाथ्यापूर्ण दु, छखे जातिय स्वशासन प्राप्ति झीगु अतिकं सतिक्क वयेधुंकल, मेखे उगु अधिकार मबीगु तःधंगु षड्यन्त्र जुयाच्वंगु दु ।'
शान्ति प्रक्रिया व संविधान निर्माण नापनापं जुइमाःगु खःसां आः संसदवादी दलतय्सं शान्ति प्रक्रियायात न्हापा क्वचायेकेमाःगु शर्त तयाच्वंगु व अझ माओवादीं हे संविधान निर्माणय् पंग थनाच्वंगु धकाः द्वपं बियाच्वंगु वय्कलं धयादिल ।
'विवाद समाधान उपसमितिइ जिं जातिय स्वयत्तता, आत्मनिर्णयया अधिकार लगयात खँ न्ह्यथंनेवं शान्ति प्रक्रिया दिउगु खः' प्रचण्डं धयादिल, 'तर झीसं शान्ति प्रत्रिया न्हापा क्वचायेकाः जनताया संविधान मवइगु कथं ब्ल्याङ्क चेकय् सहि यायेगु जुइफइ मखु ।'
मुक्ति मोर्चाया न्वकु नापं पर्यटन राज्य मन्त्री दिलिप महर्जनया सभापतित्वय् जूगु ज्याझ्वलय् नेपाः राष्ट्रिय पार्टीया नायः डा. केशवमान शाक्य, नेवाः जागरण मञ्चया संयोजक सुजीव बज्राचार्य व नेवाः लोकतान्त्रिक संघया नायः केबी घःजुं नं न्ववानादीगु खः ।
