मेडियाय् थुगुसीया बन्द

संवाददातापाखें

सामान्यतया नेवाःतय् गतिविधिया समाचार थनया मूलधार धाःपिं साचार माध्यमतय्सं प्रकाशन/प्रशारण मयाः । तर थुगुसी नेवाःतय्सं याःगु नेपालमण्डल बन्दया समाचार अजूचायापुक हे साचार माध्यमय् बय्बय् जुल ।

थुगुसी जूगु बन्दय् नेवाः आन्दोलन व थनया साचार माध्यम धइगु छगू नं मचायेक हे मू विषय जुयाः पिलू वल । बन्दया झ्वलय् नेवाःतय्सं गुलि-मछि ज्याझ्वः यात उकियात संचारं थाय् मबिउ । संचार माध्यम क्वाकेत ग्वसाः खलः नेवाः स्वायत्त राज्य मंकाः संघर्ष समितिं छगू पत्रकार सम्मेलन यात । तर ज्याझ्वलय् वःपिं पत्रकारतय्सं समोसा जक नया वल समाचार धाःसा समोसाग्वः ति हे मबिउ । उकिं नेपालमण्डल बन्द कुन्हु साचार माध्यम प्रति नं आक्रोश प्वंकेगु ज्या जुल । अले साचार माध्यमया छुं गाडीइ तोडफोड नं जुल । बसन्तपुली जूगु सभाय् नं साचार माध्यमतय् विरुद्ध पितं धस्वाकेगु ज्या जुल ।

न उकिया हे लिच्वः खः बन्द कुन्हुंनिसें हे साचार माध्यमतय्सं बन्दया नेतात मालेगु शुरु यात अन्तर्वार्ताया लागिं । एबीसी, सगरमाथा व एभेन्यु थेंज्याःगु समाचार च्यानल-तय्सं बन्दया लाइभ प्रशारण यात । फुक्क हे एफएमय् बन्द प्रमुख समाचार जुल ।

आन्दोलनया न्ह्यलुवा मध्यय् छम्ह भाजु मल्ल के. सुन्दरयात टेलिभिजनय् अन्तर्वार्ता बिबिउँ हे लिमलात । वय्कलं बन्द कुन्हु कान्तिपुर, इमेज, एभेन्युज आदि च्यानलय् अन्तर्वार्ता बियादिलसा रेडियोय् बीबीसी लगायत अनगिन्ती एफएमतय्सं वय्कःयाके अन्तर्वार्ता काल ।

कन्हय् कुन्हु नं करिब फुक्क हे राष्ट्रिय दैनिकतय्सं बन्दयात 'हाइलाइट' यात । सरकारी न्हिपौ गोरखापत्रं बन्दयात प्रमुख समाचार दयेकाः छापे यात । कान्तिपुरं दुने पेजय् समाचार तःसां ताःहाकः हे 'स्टोरी' यात । नागरिक न्हिपितं ला पूरा हे छगू पेज बन्दया फोटो छापे यात लिसें आर्थिक पृष्ठय् कुलेश्वरया फलफुल बजारय् जूगु आक्रमणयात मू समाचार दयेका हल । अझ बन्दया प्रभाव बारे फिल्मी कलाकारतय् बिचाः समेत उकी छापे याना हल । नेपाल समाचारपत्रं न्हापांगु पेजय् हे फोटो व समाचार छापे यात । समाचारपत्रं थ्व आन्दोलनयात शुरुंनिसें हे ग्वाहालि जुइ कथं समाचार बिया वयाच्वंगु खः । राजधानी न्हिपितं न्हापांगु पेजय् व दुने नं समाचार बिलसा अन्नपूर्ण पोष्टं पिने मि च्यानाच्वंगु फोटो तयाः दुने समाचार छापे यात । उकथं हे द काठमाडौं पोष्ट राइजिङ नेपालं नं न्हापांगु पेजय् हे समाचार बिल ।

बन्दयात राष्ट्रिय दैनिकतय्सं प्रोत्साहन मबिउ । उकिं म्हीगया बन्द बारे नं उमिसं सकारात्मक समाचार मबिउ हे धायेमाः । अप्वःसिनं बन्दं सर्वसाधारणयात मर्का जुल धकाः हे च्वल । अन्नपूर्ण पोष्टं नेपालमण्डल बन्दय् ताम्सालिङं दावी यानाच्वंगु लागा नं बन्द जुल धकाः निगू जातियात ग्वाकेगु विश्लेषण बिया हल । बन्दयात अप्वःस्यां आलोचना याःसां बन्द जूगुया मुख्य कारणयात धाःसा सुनां नं आलोचना मयाः । नेवाः स्वायत्त राज्य पलिस्था यायेमाः धइगु नारा-यात छुं नं साचार माध्यमं विरोध मयाः ।

साचार माध्यमतय्सं थुगु बन्द बारे थपाय्सकं समाचार 'क्यारी' यात ले सा स्वय्म साचारकर्मी समेत जुयादीम्ह नेवाः न्ह्यलुवाः भाजु मल्ल के। सुन्दरं धयादी, - 'थ्व नेवाःतय् आन्दोलनया बलं यानाः जूगु खः ।'

न्हापा न्हापा थपाय्सकं समाचार मबिउ । तर थुगुसी आन्दोलनया धार मेकथं हे दु । साचार माध्यम कर्पिनि मिखा चायेकीगु निकाय खः तर थुगुसी नेवाःतय् बन्दं साचार माध्यमतय् नं मिखा चायेका बिल । थुगुसी नेपालमण्डल बन्दं काःगु छगू विशेष लबः थ्व नं खः धायेमाः ।

More Stories Like this