'बुल्डोजर आतंक'या बारे सरकार नाप गम्भीर सहलह याये : प्रचण्ड
एनेकपा (माओवादी)या नायः प्रचण्डं येँय् जुयाच्वंगु सतक बिस्तारया बारे सरकारनाप गम्भीर सहलह यायेगु खँ धयादीगु दु ।
आइतवाः येँय् जूगु छगू ज्याझ्वलय् प्रचण्डं सतक बिस्तार याये न्ह्यः पार्टी-पार्टी व थनया आदिवासी नेवाःत नाप सहलह यायेधुंकाः जक याःसा बांलाइगु न्ह्यःथनादिसें थःम्ह थुगु हे ज्याझ्वलय् वयाः जक सतक विस्तारयात जनतां 'बुल्डोजर आतकं' कथं कयाच्वंगु व उकीं जनता प्रभावित जुयाच्वंगु खँ सिउगु धयादिल ।
ज्याझ्वलय् आपलं नेवाःतय्सं सरकारं सतक बिस्तारया नांमय् यानाच्वंगु 'बुल्डोजर आतकं'या बारे प्रचण्डया लिसः फ्वंगु खः । लिसः बिइगु झ्वलय् वय्कलं थुगु ज्या पार्टीया निर्णय कथं मखसें सरकारी निर्णय कथं जूगु धयादिल ।
'सरकारी निर्णय कथं जुयाच्वंगु ज्या जूसां सरकार व पार्टीया स्वापू मदु धाये मिले जुइमखु' वय्कलं धयादिल, 'जिगू हे पार्टीया नेतृत्वय् सरकार सञ्चालन जुयाच्वंगुलिं जिं थुकीया बारे सरकारनाप गम्भीर सहलह याये ।'
उगु हे ज्याझ्वलय् नेपाः राष्ट्रिय पार्टीया नायः डा. केशवमान शाक्यं संघीय व्यवस्था लिपा थनया जनसंख्या म्हो जुइगु जूगुलिं आः सतक बिस्तार यानाच्वने म्वाःगु धयादिल । वय्कलं मोहनीया इलय् थनया जक मनूत दइगु इलय् सतकय् मोटर तकं जायेके मफइगु धयादिसें आःया इलय् सतक बिस्ताया औचित्य मदुगु धयादिल ।
अथेहे नेवाः जागरण मञ्चया संयोजक सुजीव बज्राचार्यं नेवाःत विकास विरोधी मजूसां झिद्वः स्वयां अप्व नेवाःत विस्थापित जुइगु कथं थुगु ज्या जुयाच्वंगु जुयाः विरोध यायेमाःगु धयादिल । वय्कलं कन्हय् संघीय व्यवस्था लागू जुयाः नेवाः स्वयात्त राज्य वयेधुंकाः नेवाःतय्सं हे माःसा थनया सतक बिस्तार याइगु नं धयादिल ।
