आयोगया प्रस्तावयात शेर्पातपाखें विरोध

येँ (सन्ध्या टाइम्स)/सरकारं दयेकूगु राज्य पुनर्संरचना आयोगपाखें बहुमतया आधारय् तयार याःगु ११ प्रदेशया प्रस्तावयात शेर्पा समुदायं विरोध याःगु दु। संविधानसभाया राज्य पुनर्संरचना समितिं तयार याःगु १४ प्रदेशया नक्साय् दुथ्यानाच्वंगु शेर्पा प्रदेशयात आयोगं हःगु प्रस्तावय् षडयन्त्रपूर्वक चीकूगु द्वपं बिसें शेर्पा समुदायं आक्रोश प्वंकूगु खः। नेपाल शेर्पा संघया अध्यक्ष पेमा छिरिङ शेर्पां आयोगया प्रस्तावयात गुगुं नं हालतय् स्वीकार यायेगु जुइ मखु धयादीगु दु ।

आयोगं थःपिनि प्रतिवेदन सार्वजनिक यात धाःसा उगु प्रतिवेदनयात च्याकाः संघर्ष यायेत तकं थःपिं तयार दुगु खँ शेर्पां धयादीगु दु ।

उकथं हे नेपाल आदिवासी जनजाति महासंघया महासचिव आङकाजी शेर्पां नं आयोगया निर्णययात गुगुं हालतय् नं स्वीकार याये मखु धासें आयोगया दुजःतय्सं षडयन्त्र यानाः अथे शेर्पा प्रदेशयात चीकेगु ज्या याःगु द्वपं वय्कलं बियादीगु दु ।

थ्वहे दथुइ शेर्पातय्सं माघ १३ गते शेर्पा राज्य सुनिश्चितताया निंतिं बौद्धय् छगू तःधंगु सभा याइगु जूगु दु। बहुमतया आधारय् ११ प्रदेश दयेकेगु धकाः सिफारिस याःगुली लुम्बिनी-अबध-थारुवान राज्य, खडप्त राज्य, कर्णाली राज्य, मगरात राज्य, तमुवान राज्य, नारायणी राज्य, ताम्सालिङ राज्य, नेवाः राज्य, किराँत राज्य, लिम्वुवान राज्य व मिथिला-कोच-मधेस राज्यया नां दुथ्याकातःगु दु ।

संविधानसभाया राज्य पुनर्संरचना नापं राज्य शक्ति बाँडफाट समितिं बहुमतं पारित यानातःगु १४ प्रदेशय् दुथ्यानाच्वंगु शेर्पा राज्य, सुनकोशी राज्य व जडान राज्ययात लिकयाः राज्य पुनर्संरचना आयोगं ११ गू राज्य जक तयेगु निर्णय याःगु खः ।