नेवाः मोर्चाय् माओवादी ल्वापुया लिच्वः

येँ (सन्ध्या टाइम्स)/माओवादी दुने चले जुयाच्वंगु लाइन संघर्षया लिच्वः उकिया नेवाः संगठन एकीकृत नेवाः राष्ट्रिय मुक्ति मोर्चाय् नं लाः वःगु दु। नेवाः मोर्चापाखें माओवादी अध्यक्ष प्रचण्डयात सःताः थौं यायेत्यंगु नेवाः बुद्धिजीवीतलिसेया सहलह ज्याझ्वः थ्वहे लाइन संघर्षया कारणं विवादय् लाःगु दु। मोर्चाया केन्द्रीय नायः दिलबहादुर श्रेष्ठं थौं 'नेपाःया राजनीतिक बिस्कं ई व नेवाः स्वायत्त राज्य सुनिश्चितता' धइगु विषय तयाः थुगु अन्तर्क्रिया ज्याझ्वः यायेत्यंगु खः। थुकियात वरिष्ठ उपाध्यक्ष मोहन बैद्य पक्षधर नेवाः कार्यकर्तातय्सं धाःसा बहिष्कार याइगु जूगु दु। मोर्चाया महासचिव पवनमान श्रेष्ठं थौंया ज्याझ्वः मोर्चाया ग्वसाः कथं मजुसे प्रचण्ड गुटं जक यायेत्यंगु खः धकाः द्वपं बियादीगु दु। उखे मोर्चाया न्वकु दिलिप महर्जनं धाःसा पार्टीया हे विरोध यायेमाःसां जानकारी छगू बियाः याये जिउ धइगु पार्टीया हे निर्णय कथं थ्व ज्याझ्वः यायेत्यनागु व नेवाः स्वायत्त प्रदेशया सुनिश्चितता थौं सकलें नेवाःतय् सरोकारया विषय जूगुलिं थ्व तसकं महत्वपूर्ण ज्याझ्वः खः धयादिल ।