आपूर्तिमन्त्रीयात हाकुगु ध्वाँय् क्यन
येँ (सन्ध्या टाइम्स)/ पेट्रोलियम पदार्थय् भाः थकाःगु विरोधय् संघर्ष याना वयाच्वंगु माओवादी समर्थित अखिल क्रान्तिकारीया विद्यार्थीतय्सं थौं सुथय् आपूर्तिमन्त्री लेखराज भट्टयात हाकुगु ध्वाँय् क्यंगु दु। एमाले अखिलं ग्वसाः ग्वःगु उगु ज्याझ्वलय् माओवादी कार्यकर्तात नं सहभागी जुयाः मन्त्रीयात हाकुगु ध्वाँय् क्यंगु खः। कास्कीया लेखनाथय् जुयाच्वंगु महोत्सव समापनया निंतिं पोखरा थ्यंम्ह मन्त्रीयात विमानस्थलय् हे नाराबाजी यासे ध्वाँय् क्यंगु खः ।
मेखे पेट्रोलियम पदार्थया भाः थकाःगु विरोधय् विद्यार्थीतय्सं थौं नं येँय् सुथंनिसें हे क्याम्पस क्याम्पस न्ह्यःने प्रदर्शन यानाच्वंगु दु। त्रिचन्द्र कलेजय् प्रहरी व विद्यार्थीतय् दथुइ ल्वापु तकं जूगु दु। थ्व प्रदर्शनं यानाः स्वनिगःया ट्राफिक व्यवस्थाय् समस्या ब्वलंगु दुसा सार्वजनिक सवारी साधन म्हो जक चले जुयाः यात्रुतय्त सास्ती जूगु दु। थ्वहे दथुइ आन्दोलन याना वयाच्वंगु १३ विद्यार्थी संगठनं थौं न्हिनय् १२ बजे लिपांनिसें नेपाल आयल निगमया ज्याकू बबरमहलय् घेराउ यायेगु ज्याझ्वः तयातःगु दु ।
