गथांमुगः भस्रेस कट्टवाल

गथांमुगःया छय्चा भाइ

न्हापां छगू खँय् स्पष्ट अवधारणा निं तयेगु बिचाः याना । व छु धाःसा फुकसिनं हनेबहःम्ह सम्पादकया लिउने 'जू' धइग विशेष विशेषण घानाः 'सम्पादकजु' धाइथाय् 'सम्पादक भाइ' धायेबलय् थ्व ला सरासर मान हानीया खँ जुल धकाः बिचाः याना दीमते । थुकिया दुखँ स्पष्ट याये । ध्यान तयाः स्वयादिसँ ।

छिगु शंका पाय्छि हे खः । तर आः झीपिं २२/२३ दलया 'भाइ भाइ' जवंसेंलि नेपाः राष्ट्रिय पार्टीया नातां नं छितः 'सम्पादक भाइ' धकाः संवोधन यायेगु जिगु नं बाध्यता जुल मखुला मेतां 'भाइ' धकाः धया च्वनाग मखु । जिमि मामं स्याक्क छितः बुइकूगु नं मखु । न जिमि मांयात मां नालाः गबलें मांया ख्वाः छिं स्वःवःगु दु । अथेसां आः चाहिं झीपिं भाइ ! भाइ ! न्हांसा । तंचाया दीमते खं ला !

आः थन विशेष रोचक कासा जुइत्यंगु दु । उकिया आखौं देखा हाल 'लाइभ कन्सर्ट'बारे छत्वाःचा खँ तये त्यनागु दु । ध्यान ज्ञान केन्द्रीत यानाः दिसँ सा न्हां !

एघार महिनाया वर्षपात्रो दयेकेग खँय् गज्याःगु बबाल जूगु । अन्ततः सहमति जुइ मफुसां २२/२३ दल दथुइ थुकुसिया गथांमुगः नखः चाहिं जेष्ठ महिनाय् यायेमाः धकाः छगू मत जुल धाःगु न्यनेदु । थ्व सहमती लिपा 'गथांमुगः नखः' यात परम्परागतं क्वकयाः अन्तर्राष्ट्रिय नखःया रुप बियाः 'गथांमुगः भसे्रस कट्टुवाल धेंधेंबल्ला कासा' म्हितकीगु जंगी ऐलान याकनं देश विदेशय् न्यंक नं यायेगु तयारी बारे जितः जिमि पत्याः यायेबहःम्ह जूगुलिं सुबिस्ता नक्सां कनाच्वना । खँ एकान दुईकान मैदान याये न्ह्यः चाहिं बिचाः यानादिसँ ।

मेगु दुबिस्ताया खँ छगू नं दु । व खँ छु धाःसा कासास्थल संस्कृतिमय यायेगु लागिं नाय्खिं बाजां नं तयेगु निणय याःग दु हँ । उकिया जिम्मा चाहिं मेपिंत बियां जीख्वाः मवःगुलिं थ्व जिम्मा 'खड्ग पार्टी नेवाःतय्त बीमाली धकाः एकमत निर्णय याःग दु हँ ! थ्व ला धात्थें लसकुस यायेबहःगु खँ हे खत । ऐ…॥ उकिं जुइ का ह ला पार्टीया लिमलाःगु ?

आः थ्व 'गथांमुगः भसे्रस कट्टुवला' नखः सुथांलाकेत छगू अनुगमणया जिम्मा चारतारे होटल ब्वाइयात बीगु क्वःजी धुंकल धाःगु दु । चर्काचर्की बहसया दथुइ अन्ततः कट्टुवाल पक्षयात नुगलय् स्याकेमत्यः धकाः धार्मिक भावनां उत्पे्ररित जुयाः चार…यात हे बीगु अन्तिम निर्णय याःगु खः धाःगु दु ।

भाइ ! मेमेगु स्याम्पुलगु रोचकंगु खँ न्यनेगु ला ल्यं हे दनि । 'थ्व गथांमुगः भसे्रस कट्टुवाल धेंधेंबलाः कासा' या छायांकन यायेत देशी-विदेशी महादूत नं वइ धाःगु दु । वय्कःपिं खाली ल्हातं वइगु चाहिं मखु हँ ! यां यां बडा-बडागु क्यामुरा ज्वनाः शुरुनिसें अन्त तकयागु दृश्य छायांकन यानाः हलिमय् न्यंकं नं लाई टेलीकाष्ट याइगु हं ! क्या जक मज्जा जुइगु भाइ ! अनिकालय् पुसा ल्यंकिं हुलमुलय् ज्यान खंकि' धाइगु उखानयात लुमंकाः छेँय् क्वथाय् च्वनाः पपकर्नया मज्जा काकां स्वःसां गाः । छुं जुयाः मखुथें जूसा छु याये उकिं छेँय् च्वनाः स्वये !

मेगु खँ छु धाःसां भाइ ! कासा जक जुइबलय् भचा म्हाइपुइ धकाः उकियात न्ह्याइपुसे च्वंकेत झी नुगः प्रसाद मिश्र बाज्यायात अय्करिङ्गया ज्या बीगु खड्ग पार्टीया सुझावयात सहस्रताली थानाः स्वागत यात धाःगु दु ।

जिगु बिचाः व छंगु बिचाः मासंगल्लि व जनबाहाःति हे तापाः मजू खिनं । बरु छगू गोप्य खँ छु दु धाःसां अय्करिङ्गया जिम्मा बल्खु पाटीयात हे माः धकाः हालाच्वन हँ । छाय्धाःसां 'गथांमुगःयात स्यानाः मि तइम्ह बल्खु पाटी' जूगुलिं अय्करिङ्गया जिम्मा उमित बीमाः धकाः सलं वांन्याये थें वान्यानाच्वन । धाःगु दु …॥

अय्अय् छिपिं छु धकाः ततःसलं हालाच्वनागु हां धयाः अन लाखे च्वलापतिचां च्वामुक्क धस्वाकाः वल हँ ! वय्कः वयेव चाहिं चि नःम्ह खा थें फुक्क भुग्लुं च्वनं हँ ! अले ला घण्टाकर्ण जुइगु जिम्मा बीधुंकाः छुंकिया मेगु जिम्माया माग धकाः हालाच्वंगु सकलें सुम्क च्वं । बरु छता खँ स्पष्ट हे याये कि थ्व अल्पकालीन संगीन समय हनिमून याये खनी मखु । अथे जूगुलिं आः हे धयातये थ्व कासा अर्थात गथांमुगः भसे्रस कट्टुवाल धेंधेंबल्ला कासा चारतारें लीड याइ । थुकी सुयां चित्त बुझे मजूसा थ्व च्वलापितं धस्वाइ । न्हापांतुं मधाः धाइ खं ला ! आःयात बाइ ! टाटा !

More Stories Like this