जनतायात सास्ती जुइगु विरोध मजिल

सरकारं पेट्रोलियम पदार्थया भावय् याःगु वृद्धिया कारणं देय्न्यंकंया विद्यार्थी संगठितत आक्रोशित जुयाः आन्दोलन सुरु याःगु दु। विद्यार्थी आन्दोलनं यानाः थौंकन्हय् न्हिंन्हिं सतक जाम जुयाः मनूतय्त मर्का जुयाच्वंगु दुसा उकिया लिच्वः कथं सर्वसाधारणया जनजीवन तकं प्रभावित जुयाच्वंगु दु। विद्यार्थीतय्सं थ्व भाः वृद्धिया विरोधय् यानाच्वंगु आन्दोलनया झ्वलय् बन्द समेत घोषणा यानातःगुलिं थुकिं सर्वसाधारण जनतां मेगु मार फये मालीगु जूगु दु ।

पेट्रोलियम पदार्थया भाः थकाःगुयात विरोध यायेमाःगु ला अवश्य खः, तर अज्याःगु विरोधया ज्यां सर्वसाधारण जनतायात हे मार लाकीगु ज्या धाःसा जुइ मजिउ। पेट्रोलियम पदार्थया भाः थहां वनाः सर्वसाधारण जनतायात मार लानाच्वंगु ला जु हे जुल। बन्द थेंज्याःगु ज्याझ्वः यायेबलय् उकिं हानं मेगु मार लाः वनीगु खने दत। थज्याःगु विरोधया ज्याझ्वः यानाः हानं सरकारं थकाये धुंकूगु भाः क्वकाइ धइगु ग्यारेन्टी नं मदु। न्हापा न्हापा नं न्ह्याबलें छगू पुचलं विरोध याइ, तर माग धाःसा पूवनी मखु। उकिं विद्यार्थी संगठनतय्सं नं धाथें थःपिनि माग पूवंकेगु खःसा जनतायात मखु सरकारयात मार लाकीगु ज्या यायेमाः। सरकारयात थःपिनि ज्या हे याये मफइगु, सरकारी पदाधिकारीत लँय् हे जुइ मफइगु, सरकारी ज्याकू हे चायेके मफइगु अवस्था सिर्जना याना बिल धाःसा जक सरकारं उमिगु खँ न्यनी जुइ। जनतायात जक दुःख बीगु ज्या यानाच्वंत्तले सरकारं नं उकी ध्यान बी मखु। छाय्धाःसां सरकार जनताप्रति उत्तरदायी मजू। यदि उत्तरदायी जूगु खःसा भाः थकायेगु ज्या हे याइ मखु जुइ ।

More Stories Like this