‘झीगु स्वनिगः’या व्यवस्थापकयात आक्रमण याःपिंत ज्वनेमफुनि

यल (झीगु स्वनिगः)

झीगु स्वनिगः न्हिपौया व्यवस्थापक सचिर महर्जनयात सांघातिक आक्रमण याःपिं राजेश महर्जन, हरि महर्जन, राजभाई महर्जन, गोपाल महर्जन लगायत गुम्ह मनूतय्गु विरुद्ध प्रहरीइ जाहेरी ब्यूसां थौंतक्क प्रहरीं ज्वनेपूmगु मदुनि । प्रहरीयात जाहेरी ब्यूथें आक्रमणकारीतय्गु म्हसीके धुंकूसां यलया ज्यापु समाजया मनूतय्सं प्रहरीयात थःगु प्रभावय् लाकाः ज्वंके मब्यूगु धाःगु दु । थः तःमां मैशली महर्जनयात नापलाः वंपिं सचिर, लक्ष्मी महर्जन व प्रेम महर्जनपिंत आकाझाकां अन्धाधुन्ध आक्रमण यायेवं सचिर व लक्ष्मी बांमलाक्क घाःपाः जूगु खःसा प्रेम महर्जन अनं उम्कय् जुयाः प्रहरीयात सुचं ब्यूवंगु खः ।

तःन्हुमछि दतं नं प्रहरीं आक्रमणकारीतय्त मज्वंगु स्वये – गनं प्रहरीत आक्रमणकारीत नाप मिलय् जूगु जकं मखुला धकाः न्ह्यसः नं थनेगु यानाहःगु दु । सामान्य मनू नापलायेगु ज्याय् थुगुकथं छाय् व छु कारणं छक्वलं आक्रमण यात धयागु खँ हे स्पष्ट जूगु मदुनि । वंगु माघ ३ गते बहनिसिया ८ बजे जूगु उगु घटना लिपा यलया महानगरीय प्रहरी प्रभाग जावलाख्यः व प्रमुख जिल्ला अधिकारीया जिल्ला प्रशासन कार्यालयय् निवेदन बीधुंकूगु खः । तर प्रहरीं अपराधीतय्त ज्वनाः कानुनी कार्यबाही यायेगु पलेसा ज्यापु समाजया छम्ह निम्ह व्यक्तितय्गु हाहालय् प्रहरी मुक दर्शक जुयाच्वंगु धाःगु दु ।