सान्दर्भिक पार्टी एकता व मंकाः ज्याझ्वः

थौं खःलाकि कन्हय् पार्टी तज्याइ धयावयाच्वंगु वर्तमान अवस्थाय् दकले तःधंगु एकीकृत नेकपा (माओवादी) पार्टी शान्ति व संविधानया नितिं छप्पँ जुयाः न्ह्याः वनीगु जूगु दु । वंगु माघ १ गते यलया खन्नां गार्मेन्टय् च्वंगु नेवाः व ताम्सालिङ्ग राज्य समितिया मंका वैठक अन्तरिमकालिन ज्याझ्वः पारित यासे पार्टी छप्प छधी जूगु दु । आःया कम्युनिष्ट पार्टी व उया इतिहासयात सरोकार तइपिनिगु नितिं थ्व छगू तसकं सुखद अनुभूति वीगु विषय जूवंगु दु । पार्टी एकताया अर्थ विवाद ज्यंगु मखुनि । पार्टीया नायः पुष्पकमल दाहाल प्रचण्ड व बरिष्ठ न्वकु किरण वैद्यं च्वयादीगु प्रस्तावयात कयाः छगूहे दयेकेगु धाःसां आःयात उगु निगुलिं प्रस्तावयात थातिइ तयाः शान्ति व संविधानया नितिं मंकाः रुपं ज्या यानाः न्ह्याः वनेगु धकाः क्व ज्यूगु दु । उगु खँ गुलित दुरुगामी व प्रभावकारी जुइ थ्व धाःसा स्वये ल्यं हे दनि ।

पार्टी छगूहे जुयाच्वनीगु धयागु सिद्धान्तं खः । सिद्धान्तय् विचलन वलकि पार्टी कुचादली । अथ्य धकाः नेपाली कांग्रेस एमालेत नं गवले गवले तज्याइ, कुचादली । तर संसदीय दलतय्गु पार्टी तज्याइगुया कारण गवलें नं सिद्धान्त जुइमखु । पद प्रतिस्था व स्वार्थया कारणं संसदीय पार्टीत तज्याइ । तर कम्युनिष्ट पार्टी धयागु अथ्यं तज्याइ मखु, विशेष यानाः पद प्रतिस्था व सम्पत्तिया कारणं ला विल्कुल तज्याइ मखु । सच्चा कम्युनिष्ट पार्टी धयागु क्रान्ति यायेगु लाकि मयायेगु धयागु न्ह्यसःया लिसः वयेवं जक तज्याइगु खः । अथ्यला माओवादी पार्टी दुने नं प्रचण्ड बाबुराम पक्षयापिसं सरकारय् दुत यंकेगु धयाः धाःगु मन्त्रालयत वीगु धयाः किरण पक्षयापिं नेतात मात्रै पद व प्रतिस्थानया ल्यू ल्यू वनीपिं थें प्रचण्ड बाबुराम पक्षयापिसं भ्रम वीत मस्वःगु नं मखु । बाबुराम भट्टराईया नेतृत्वया सरकारय् मवनेगु स्पष्ट अडान कायेक कायेक नं मन्त्रालयया खँ न्ह्यःने हयाः सर्वसाधारण जनताया मिखाय् धुलं छ्वाकेत स्वःगुहे खः । तर पद प्रतिस्थाया निति मखु, स्वार्थया निति नं मखु, माओवादी पार्टी दुनेया विवाद क्रान्ति नाप सम्वन्धी जुइवं संस्थापन पक्षयापिं लिहां वंगु खः । थुकिया अर्थ थौं तक्कया दुने गुलिनं गल्ति, कमि कमजोरीत प्रचण्ड बाबुरामपिनिगु पाखें जुल व दक्को भिंकेगु पाखे वनी धयागु मदु । प्रचण्ड बाबुरामपिनिगु पाखें न्हय्गू बुंदे विपा सम्झौता, स्वंगू बुंदे सहमति लगायत ज्याखँत जुल, उकियात भिंकेगु स्वयाः आः वइगु न्हिइ निगू पक्षया दथ्वी सहलह व्याका जक न्ह्याः वनेगु क्वज्यूगु दु ।

शान्ति व संविधान नेपाली जनताया नितिं थें एकीकृत नेकपा (माओवादी) या नितिं महत्वपूर्ण खः । शान्ति प्रकृया झ्वलय् सेना समायोजनया ज्या न्ह्यानाच्वंगु दु । जनयुद्धया इलय् लाका कयातःगु सामन्त व जमिन्दारतय्गु छेँ बुँ लित वीगु लगायत खँ पार्टीया नीति व निर्णय विपरित जुइवं पार्टी दुने व पिने थुकि समस्या न्ह्यःने हःगु खः । थुकियात भिंकेगु नितिं पलाः छीत स्वयेवं नेपाली कांग्रेस व एमालेत तितिं न्हुयाः हालाहल, संसद सतकं जनसत्तायात महत्व वीन, वैधानिकता वीनं धकाः हाःगु हालं । थुकिं यानाः संविधान च्वयेगु ज्याय्हे नकारात्मक प्रभाव त्वःतल । संविधान च्वयेगु ज्या निश्चित ई दुने क्वचायेके माःगुयात नं वास्ता मयासे मात्रै हल्लाया खेती यानाः संविधान च्वयेगु ज्याय् पंगः थनावयाच्वंगु दु । थुज्वःगु संवेदनशील व संक्रमणकालय् संसदवादीतय्गु संविधानयात दथ्वी हे थाकाः संविधानसभायात भंग याकेगु संसदवादीतय्गु षडयन्त्रयात चिरे यायेत पार्टी एकता सान्दभिकहे जुइ ।

More Stories Like this