थःहे ज्याकःमिं रञ्जितयात स्यात

ख्वप (झीगु स्वनिगः)>/b>

ख्वप नगरपालिका इनाचोया रञ्जित राइस मिल न्ह्याकाः वयाच्वंगु ख्वप – ७ गोलमढीइ च्वंम्ह गंगासागर रञ्जितयात म्हिगः वंगु बहनी थःहे ज्याकःमिं स्यानाःब्यूगु दु । वंगु शुक्रबाः जक ज्याय् तःम्ह तराई मूलया ज्याकःमिं सिंया मुगलं छ्यनय् दायाः रञ्जितयात स्याःगु महानगरीय प्रहरी परिसर ख्वपया प्रहरी निरीक्षक रुपक खड्कां जानकारी ब्यूगु खः ।

हत्यालिपा बिस्युं वनाच्वंपिं उम्ह ज्याकःमियात ज्वनेत म्हिगः सुथंनिसें महानगरीय प्रहरी परिषद् ख्वपं विशेष प्रहरी टोली परिचालन यानाः मालेगु ज्यायात तीब्रता ब्यूगु दु ।
प्रहरीं सुथंनिसें हत्यारातय्त मालेत राजमार्ग व सहायक मार्ग नाकाबन्दी यानाः फुक्क धइथे सवारी साधनया जाँच याःगु दु । ज्याकःमियात ख्वाः म्हस्यूम्ह मनूया ग्वाहालिइ वयात म्हसीकेत स्वःगु प्रहरीं जानकारी ब्यूगु खः । हत्याराया वास्तविक नां लिसे थाय्बाय् अझ नं सीमदुनिगु व अनुसन्धान जुयाच्वंगु प्रहरीं जानकारी ब्यूगु खः ।