शान्ति प्रक्रिया न्ह्यःने न्ह्याकेत निर्णय लित कायेमाःगु – महामन्त्री सिंह

येँ (झीगु स्वनिगः)

नेपाली कांग्रेसया महामन्त्री प्रकाशमान सिंहं द्वन्द्वकालय् माओवादीं याःगु अवैध ज्यायात मान्यता बिइगु निर्णय सरकारं याकनं लित कायेमाःगु धयादीगु दु । नेपाल तामाङ संघ येँपाखें २८४८ क्वःगु लोसारया लसताय् म्हिगः ग्वसाः ग्वःगु भिंतुना कालबिल लिसे तुच्चा ज्याभ्mवलय् वय्कलं उगु निर्णयपाखें शान्ति प्रक्रिया न्ह्यःने न्ह्यायेमफइगुलिं उकियात लित कायेमाःगु खँय् बह बियादिल ।

महामन्त्री सिंहं देय्या राष्ट्रिय संस्कृतियात सम्पन्न दयेकेत थीथी जाति समुदायया भाषा, संस्कृति व पर्वया महत्वपूर्ण भूमिका दुगुलिं राज्यं उकिया संरक्षण यायेमाःगु धयादिल । नेपाल तामाङ संघया नायः अन्जान लामां माघ शुक्लपक्ष प्रतिपदा तिथिइ हनीगु लोसार तामाङ समुदायया न्हूदँ जूसां नं उकिं फुक्क नेपाःमिया सुख, शान्ति व समृद्धि कायम यायेफयेमाः धकाः मनंतुनादिल । नेपाल तामाङ संघ येँ जिल्लाया नायः पुनम लामां लोसार पर्वया ऐतिहासिक महत्वयात आम समुदायदथुइ प्रचार प्रसार यायेत थःगु संस्था क्रियाशील दुगु न्ह्यःथनादिल ।