वि.सं.या थासय् ईश्वी सम्वत् छ्यलीगु

हिन्दु धर्मावलम्बित तमं मि

येँ (झीगु स्वनिगः)

नेपाल सरकारं याकनं हे विक्रम सम्वत्यात चीकाः ईश्वी सम्वत्यात छ्यलेत्यंगु दु । थुकियात माःगु तयारी पूवने धुंकूगु धाःगु दु । याकनं सरकारं घोषणा यानाः औपचारिकता बीगु तयारीइ दु । नेपाःया थःगु हे मौलिक सम्वत् नेपाल सम्वत्यात सरकारी मान्यता बियाः आन्तरिक व सांस्कृतिकरुपं छ्यलाबुलाय् हयेगु सरकारया थुगु निर्णयात कार्यान्वयन हयेमाःगु नेपाली जनताया अत्यधिक दवाबयात महशुस याःगु लगत्तै विक्रम सम्वत्यात कयाः छु यायेगु धयागु न्ह्यसः दनावयाच्वंगु खः ।

तर माओवादी सरकार वयेवं पूर्ववत् माओवादी सरकारया ल्यंपुल्यं ज्याखँयात न्ह्यःने यंकेगु तातुनाः प्रधानमन्त्री डा. बाबुराम भट्टराईया सरकारं थुगु पलाःयात हानं न्ह्याकेगु कुतः याःगु खः । भारतया पुलांम्ह जुजु विक्रमादित्यया नामय् स्वनातःगु विक्रम सम्वत्यात नेपालय् छ्यलाबुलाय् हयेगुया छुं हे औचित्यता मदुगु खँय् विशेषज्ञपिंसं ताःइलंनिसें आपत्ति प्वंकावःगु खः । भारतय् वि.सं.यात छ्यलाबुलाय् हयाच्वंगु मदु ।
तर सरकारया थुगु राष्ट्रवादी पलाःयात कयाः हिन्दु धर्मया कट्टर अनुयायी जुजुवादी व ब्राम्हणवादीतय्सं विरोध यायेगु शुरु जूगु दु ।

थुकिया नितिं विरोध छु गुगुकथं याइगु धयागु खँ स्पष्ट मजूनिसां सरकारं थुगु पलाःयात ब्राम्हणवादीत संगठितरुपं राष्ट्रिय सम्वत्या नामं अले नेपाःया संस्कृति व परम्पराया विरुद्ध माओवादी कुहांवल धकाः सर्वसाधारण जनताया दथुइ भ्रम बीत्यंगु प्रष्ट दु ।