प्रहरी व विद्यार्थी दथुइ ल्वापु

आपालं विद्यार्थी घाःपाः, थौं खालीगु सिलिण्डर जुलुस

येँ (सन्ध्या टाइम्स)/नेपाल आयल निगमं ग्यास, मचिकं, डिजेल व पेट्रोलय् भाः थकाःगु विरोधय् थौं नं विद्यार्थीतय्सं थाय्थासय् प्रदर्शन याःगु दुसा अज्याःगु प्रदर्शनया झ्वलय् ल्वापु जुयाः आपालं विद्यार्थी घाःपाः नं जूगु दु ।

सरकारं वार्ताय् वयेत आह्वान याःसां विद्यार्थीतय्सं उकियात अस्वीकार यानाः थौं सुथय् हे येँया प्रदर्शनी मार्गया रत्नराज्य क्याम्पस न्ह्यःने विद्यार्थीतय्सं याःगु प्रदर्शनय् प्रहरी व प्रदर्शनकारीतय् दथुइ ल्वापु जूगु खः। प्रहरी हस्तक्षपय् लानाः उगु क्याम्पसया स्ववियु सभापति राजकुमार राई नापं खुम्ह विद्यार्थी घाःपाः जूगु दु। आक्रोशित विद्यार्थीतय्सं राष्ट्रपति कार्यालयया बा. १ झ ८३८२ नम्बरया गाडीइ नं मि तया बिउगु दु ।

विद्यार्थीतय्सं येँ, यल व ख्वपया थीथी क्याम्पस न्ह्यःने नं प्रदर्शन यानाः सतक जाम याना बिउगु दु। थुकिं यानाः थौं सुथंनिसें हे स्वनिगःया ट्राफिक व्यवस्था अस्तव्यस्त जुयाच्वंगु दु। विद्यार्थीतय्सं यानाच्वंगु प्रदर्शन नियन्त्रण यायेगु नामय् प्रहरीं जाँच बिउ वयाच्वंपिं विद्यार्थीतय्त तकं ज्वनेगु सुरु यासेंलि थौं आरआर क्याम्पसय् स्नातक निगूगु दँया जाँच नं स्थगित जूगु दु। अथे हे स्वनिगलं पिने नं थाय्थासय् प्रदर्शन जूगु दुसा थ्व झ्वलय् प्रहरीलिसे तःगूमछि थासय् प्रहरीलिसे ल्वापु जूगु व उकी लानाः तःम्हमछि विद्यार्थीत घाःपाः नं जूगु खँ विद्यार्थी नेतातय्सं धाःगु दु। सरकारं बिना तयारी वार्ताय् वयेत आह्वान याःगुलिं थःपिं वार्ताय् मवनागु खँ नं विद्यार्थी नेतातय्सं धाःगु दु ।

थ्व हे दथुइ आन्दोलनय् कुहां वयाच्वंगु १३ गू विद्यार्थी संगठनतय्सं थौं खालीगु सिलिण्डर ज्वनाः प्रदर्शन यायेगु तयारी नं यानाच्वंगु दु। थौं सनिलय् त्रिचन्द्र क्याम्पसं उगु जुलुस पिकायेत्यंगु खँ सीदुगु दु ।

मेखे पेट्रोलियम पदार्थया भाः थकाःगु क्वकायेमाल धइगु माग यासें राप्रपा नेपालं थौं नं नेपाल आयल निगमया कार्यालयय् धर्ना च्वंगु दु ।