न्हापां सतक अनं लिपा सदन व सरकार
येँ (सन्ध्या टाइम्स)/माओवादीं शान्ति व संविधानया निंतिं सतक, सदन व सरकारया मोर्चायात नं बल्लाका यंकीगु जूगु दु। उकिया निंतिं न्हापांगु प्राथमिकता सतकयात हे नालाकाःगु खँ सीदुगु दु ।
शान्ति व संविधानया निंतिं थःपिं मखु कांग्रेस व एमाले पंगः जुयाच्वंगु दु धासें जनतायात थुइकेगु निंतिं जनपरिचालन यायेगु अले उकिया बलं संसद व सरकारय् च्वनाः नं शान्ति व संविधानया निंतिं भूमिका म्हितेगु रणनीति तयार याःगु दु। सतकय् च्वनाः हे जनतायात थुइकाः आःया अवस्थाय् तक माओवादी थ्यंगु खँ न्ह्यथँसें आः जनताया निंतिं शान्ति व संविधानया लँपु ज्वना वनेगु झ्वलय् सतकं हे तःधंगु दबाव बीत जनमत तयार यायेमाः धकाः ठहर यानाः उगु रणनीति दयेकूगु खँ धाःगु दु। आःया अवस्थाय् सविधानसभाया थीथी समितिइ जक सहलह ब्याका वन धाःसा कांग्रेस व एमाले थःगु अडानय् च्वंच्वनीगु उकिं यानाः जनताया निंतिं हित जुइगु कथं जाति, भाषा, लैंगिक व वर्गीय उत्पीडनं मुक्त जुइगु कथंया संविधान हये मफइगु जुयाः जनतायाथ् हे वनेगु रणनीति कथं हे जनपरिचालन यायेगु तयारी पार्टीं याःगु खँ नं धाःगु दु। थ्वहे दथुइ सतक संघर्षया ज्याझ्वः तयार यायेगु निंतिं माओवादीया ताम्सालिङ राज्य समितिया बैठक थौं च्वनीगु जूगु दुसा कंस नेवाः राज्य समितिया बैठक च्वनीगु जूगु दु ।
