उपप्रमपाखें भारतय् याःवंगु ब्रिफिंग

चिनियाँ प्रधानमन्त्री वेन जियाबाओं नेपाः भ्रमण याना वंगुयां प्यन्हु लिपा हे नेपाःया उपप्रधानमन्त्री विजय गच्छदार थः हे भारत वनाः अनया प्रधानमन्त्री डा. मनमोहन सिंहयात जियाबाओया भ्रमण बारे 'ब्रिफिंग' याना थकूगु दु। चिनियाँ प्रधानमन्त्रीं नेपाः वयाः छु धया थकल व वय्कःयात नेपालं छु धया छ्वत धइगु बारे भारतयात ब्रिफिंग यायेगु लागिं उपप्रधानमन्त्री विजय गच्छदारं न्हूदिल्लीया 'र्‍यापिड भ्रमण' यानादीगु खः। वय्कलं अन भारतीय प्रमयात नापलानाः चिनियाँ प्रधानमन्त्रीया नेपाः भ्रमणय् जूगु वार्ता बारे 'जानकारी' बियादीगु खः। उकियात हे लिसः बिसें भारतीय प्रधानमन्त्री मनमोहन सिंहं नं चीनलिसे नेपाःया स्वापू बांलाःगु खँय् थःपिं लय्ताः धइगु प्रतिक्रिया बियाहःगु खः ।

भारतलिसे समेत सीमा स्वाःगु व छगू कथं थःपिनि प्रतिस्पर्धी देय् जूगु कारणं चिनियाँ प्रधानमन्त्रीं नेपाः वयाः छु यात, छु धाल धइगु खँय् भारतया रुची दइगु खँयात नकारे याये मछिं। तर उकिया लागिं वं नेपाःस्थित थः राजदूतयात खटे यानाः माःगु खँ बुझे याके जिउगु खः। अथे मयासे नेपाःया उपप्रधानमन्त्री थेंज्याःम्ह मनूयात हे थःगु देशय् सःताः ब्रिफिंग कायेगु भारतया तःधंगु हे दादागिरी प्रवृत्ति खः। अले नेपाःपाखें नं राजदूत मार्फत याके माःगु अज्याःगु ज्या उपप्रधानमन्त्री थेंज्याःगु पदय् च्वंम्ह मनू थः हे ब्वाँय् वनाः चाकडी याः वनेगु कुटनीतिक मर्यादाया उल्लंघन जक मखु दासताया पराकाष्ठा नं खः। थ्व ब्रिफिंग याःगु वापत भारतं डा. बाबुराम भट्टराईया वर्तमान सरकारयात हे राष्ट्रिय सरकार दयेके माली धइगु 'फरमान' जारी याःगु सन्देश नं वःगु दु ।

More Stories Like this