थकाःगु भाः तुरुन्त क्वका

नेपाली जनतायात राहत बी, सुख शान्ति बी धकाः धयावःम्ह प्रधानमन्त्री डा. बाबुराम भट्टराईया सरकारं म्हीग आपलुखं चुपचाप चिकंया भाः थकाःगु दु । थथ्य भाः थकयावीवं तसकं दुःख कष्टय् म्वानाच्वंपिं नेपाली जनता थप कष्टय् लाःवंगु दु । छन्हु न्ह्यः तक्क १०५ तकां न्यायेत थाकुयाच्वंगु पेट्रोलया भाः आः झितका अप्वयेकाः ११५ तका याःगु दु । अथ्यहे मचिकनय् ८५ तका, डिजेलय् ९० तका व ग्यासय् १५०० तका भाः क्वछ्यूगु दु । थुकिं देशया मूल्य वृद्धिइ तःधंगु नकारात्मक प्रभाव त्वःतीगु व नेपाली जनतायात वर्तमान सरकारपाखें हे वीगु आशा यायेगु तकं व्यकार जुइगु खनेदु ।
चिकंया भाः थकायेवं थुकिया तप्यंकहे यातायातं भाः थकाइ, सार्वजनिक यातायातया साधनय् नकतिनि भाः थकाःगु लगत्तै हानं थकाइ व सर्वसाधारण जनतायात थीकेक ध्यबा पुलाः मोटर गये माःगु अवस्था वइ ।

नेपाल आयल निगम द्यापं च्वने माःगुलि थुगुकथं मूल्य समायोजन यायेमाःगु धाःसा नं थ्व खँयात आम जनतां स्वीकार याइगु अवस्था मदु । निगमदुने भ्रष्टाचारयात पनेगु ज्या मयासे केवल जनतायात तप्यंक नकारात्मक प्रभाव लाइगु ज्या जक यायेत सरकार थुगुकथं छाय् न्ह्यःने वयाच्वन ? धयागु न्ह्यसःया लिसः बी फयेमाः ।
नेपाल आयल निगम भ्रष्टाचारया केन्द्र विन्दु जुयाच्वंगु दु । निगम घाटाय् वनाच्वंगु कारण निगम दुने जुयाच्वंगु भ्रष्टाचार खः । तर अन दुने भ्रष्टाचारीतय्त भ्रष्टाचार यायेगु मौका व अवसर वियाः जनताया बपिक्वंय् त्वाथलेगु कथं चिकंया भाः जक छाय् थकया च्वन ? निगम दुनेया भ्रष्टाचारय् सरकारया नं ल्हाः जक मदुला ? मखुसा निगम दुनेया भ्रष्टाचार जू मजू धकाः सरकारं अनुसन्धान समिति दयेकाः अध्ययन याके धुंकाः समितिं व्यूगु सुझावयात छाय् कार्यान्वयन मयात ? निगमया भ्रष्ट अधिकारीतय्सं सरकारय् मन्त्रीतय्त जकं कमिशनं खल्ति जायेकाच्वंगु मदुला ?
मखुसा सरकारं चिकंया भाः थकायेगु पल्सा निगमया दुने सुधारया लँपुइ यंकेमाःगु खः । निगमयात पारदर्शि यानाः भ्रष्टतय्त निगमं लिकायेमाःगु खः । लेखापरिक्षण मजूगुहे दं दं दयेधुंकल तर नं सुनां ध्यान वीगु यानाच्वंगु मदु । कर्मचारीतय्गु सुविधा वियांच्वंगु दु । खरीद विक्रीइ भ्रष्टाचार जुयाच्वंगु दु । एनजिओतय्त सहुलियित दरं पेट्रोल वियाच्वंगु दु । निगमय् कर्मचारीतय्गु संख्या पाय्छि दुगंछि अप्वः दु । चिकं ल्हयइगु ट्यांकरं लँ दथुं पेट्रोल तनाच्वंगु दु । थुज्वःगु समस्याया समस्यां भ्रस्त निगमं धाः धाःथे चिकंया भाः जक थकायेगु मयासे निगम दुनेया भ्रष्टाचारयात नं ध्यान वी माःगु खः । तर सरकार थुखेपाखे मिखा वीगु स्वयाः निगमया माग पूवंकेत दृढ खनेदु ।
चिकंया भाः अन्तराष्ट्रिय क्षेत्रय् नं अप्वया च्वनीगु चीज खः । अथ्य खयां नं वैकल्पिक व्यवस्था नं यायेमाः । लच्छिया करौडौं ब्याज पुलावःम्ह निगमं थुकियात पूँजीइ रुपान्तरण यात धाःसा नं द्यापं म्हो जुइ । चिकनय् कयावःगु राजस्व क्वचालेफु ।

निगम दुनेहे सुधारया ज्याझ्वः जक न्ह्याकेफुसां द्यापं कुहांवइ । थुज्वःगुकथंया वैकल्पिक व्यवस्थाया सम्भावना दयेक दयेकं नं छक्वलं भाः जक अप्वयेकेगु धयागु जनता प्रतिया जिम्मेवारीं सरकार विसुं वनेगु खः । आम जनतायात मर्काय् लाकाः समस्याया समाधान गवलें जुइहे फैमखु ।
थुया दथ्वी अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) लगायत मेमेगु विद्यार्थी संगठनतय्सं भाः थकागुया विरोध याःगु दु । थकाःगु भाः तुरुन्त क्वमकाल धाःसा विद्यार्थीतय्सं सतक क्वाकेत्यंगु दु । अथ्यहे उपभोक्ता हित संरक्षण मञ्चपाखें नं भाः थकाःगुया विरोध यानाः तत्काल उगु निर्णय लित कायेत इनाप याःगु दु । प्रति लिटर ६६ तकाः तूगु पेट्रोलया भाः ११५ तकां मियाःनं द्यात धायेगु हास्यास्पष्ट खँ जूगु उपभोक्तातय्गु द्वपं सही खनेदु । जनविरोधी निर्णय यायेगु पल्सा सरकारया नेतृत्व यानाच्वंम्ह डा. भट्टराई राजिनामा वीगु कल्याण जुइ ।

More Stories Like this