पशुपतिइ १० गते मसाल जुलुस
येँ (झीगु स्वनिगः)
बुधवाः बहनी थ्यं मथ्यं सवा ८ बजे सलंसःम्ह प्रहरी व सशस्त्र प्रहरीत परिचालन यानाः पशुपति लागाया २३१ टहरा थुनाः च्याकाः बिउगु विरोधय् पशुपति वनकाली व्यवसायी संयुक्त संघर्ष समितिपाखें संघर्ष ज्याझ्वः घोषणा याःगु दु । म्हिगः विहिवाः सुथय् पीडित स्थानीयवासी व सुकुम्वासीतय्गु भेलां नीस्वंगु उगु संघर्ष समितिं म्हिगः विहिवाः सनिलय् पशुपति लागाय् विरोध जुलुस पिकाःगु दु । अथे हे थौं शुक्रवाः पशुपति विकास क्षेत्रनाप स्वापू दुगु निकायलय् वनाः ज्ञापन पौ बिइगु, शनिवाः सुथय् पशुपति लागाय् ११ बजेनिसें विरोध प्रदर्शन यायेगु, आइतवाः ८ गते पशुपति विकास परिषद्य् धर्ना व विरोध प्रदर्शन यायेगु, ९ गते नं धर्ना च्वनेगु अले १० गते सुथय् धर्ना च्वनाः बहनी पशुपति लागाय् मसाल जुलुस पिकायेगु निर्णय याःगु दु ।
उगु संघर्ष समितिं प्रहरीं थुनाछ्वःगु थासय् च्वंपिनिगु नितिं वैकल्पीक व्यवस्था यायेमाःगु, व्यवसायीक परिचयपत्र लागू यायेमाःगु, थःपिं च्वनाच्वनागु थाय्या भाडा दर निर्धारण यायेमाःगु, प्रहरीं स्यंकाब्यूगु टहरा व सामानया क्षतिपूर्ति बिइमाःगु लगायतया माग यानाः उगु कथं आन्दोलनया घोषणा याःगु खः ।
