११ गते स्वनिगः बन्दया आह्वान

थौं खालीगु सिलण्डर ज्वनाः प्रदर्शन, १० गते मसाल जुलुस

येँ (झीगु स्वनिगः)

नेपाल आयल निगमं पेट्रोलियम पदार्थय् भाः थकाःगु विरोधय् थीथी राजनीतिक दलया विद्यार्थी संगठनतय्सं मंकाः कथं संघर्षया ज्याझ्वः घोषणा याःगु दु । एकीकृत नेकपा (माओवादी)या भातृ संगठन अखिल क्रान्तिकारी, नेपाली कांग्रेसया नेविसंघ, एमालेया अनेरास्ववियु नापं थीथी १३ गू विद्यार्थी संगठनया म्हिगः विहिवाः मंकाः कथं मु“ज्या च्वनाः थकाःगु भाः तत्काल क्वकायेमाःगु माग यानाः माघ ११ गते स्वनिगः बन्द नापं थीथी कथंया संघर्षया ज्याझ्वः पितब्यूगु दु ।

उगु मु“ज्यां क्वःछिनाः म्हिगः विहिवाः स्वनिगः नापं देय्न्यंकं सांकेतिक रुपं विरोध प्रदर्शन याःगु खः । कलेज कलेज न्ह्यःने विद्यार्थीतय्सं चक्का जाम यानाः प्रदर्शन याःगु खः । अथे हे कन्हय् सुथय् तकया दुने माग पूरा मजुल धाःसा थौं ६ गते हे देय्न्यंकं खालीगु सिलिण्डर ज्वनाः प्रदर्शन यायेगु, ७ गते स्वनिगलय् थाय् थासय् कोणसभा यायेगु, ८ गते शिक्षण संस्था न्ह्यःने प्रदर्शन यायेगु, ९ गते आयल निगमया कार्यालय घेराउ यायेगु, १० गते मसाल जुलुस यायेगु व ११ गते स्वनिगः बन्द यायेगु घोषणा याःगु दु ।

११ गते तकया दुने नं माग पूरा मजुल धाःसा अनं लिपाः अझ सशक्त कथंया आन्दोलन घोषणा यायेगु जुइ धकाः विद्यार्थी नेताय्सं धयादीगु दु । बुधवाःनिसें लागू जुइगु कथं नेपाल आयल निगमं जा थुइगु ग्यासय् आवंलि छगः सिलिण्डरया भाः १ सय ७० तका थिके याःगु दु । अथे हे पेट्रोलय् छगू लिटरय् १० तका, डिजेल व मचिकनय् छगू लिटरय् ९ तका भाः थकयागु दु धकाः निगमया प्रवक्ता मुकुन्द ढुंगेलं जानकारी बियादीगु दु । म्हीग सोमवाः तक उपभोक्तातय्सं ग्यास छगलय् १ हजार ३ सय २५ तका पुलाः वयाच्वंगु खःसा आवंलि छगः ग्यास १ हजार ५ सय पुलाः न्यायेमालीगु जूगु दु । अथे हे पेट्रोल छगू लिटरया १ सय ५ तका पुलाः वयाच्वंगुलिइ आवंलि १ सय १५ तका पुलाः न्याये मालीगु जूगु दु ।

उगु हे कथं छगू लिटर डिजेलया भाः ७६ तका अले मचिकंया भाः ८५ तका पुलाः न्याये मालीगु जूगु दु । उगु हे कथं आन्तरिक हवाई इन्धनपाखे छगू लिटरय् १ सय तका थ्यनाच्वंगुलिइ आः भाः थकाःगुलिं १ सय ५ तका थ्यंगु दु । उगु कथं भाः थकाःगुयात थीथी ख्यलं विरोध यानाहःगु दु । अथे हे उपभोक्ता मञ्च नेपालपाखें नं सशक्त कथं आन्दोलन यायेगु जुइ धकाः धाःगु दु । थ्व हे दथुइ अखिल क्रान्तिकारीया नायः हिमाल शर्मां पेट्रोलियम पदार्थया भाः थकाःगु भाः क्वकायेगु ज्या मयात धाःसा सरकारयात हे क्वःथलाः बिइ धकाः ख्याच्वः बियादीगु दु । मिडिया इन्टरनेशनलं म्हिगः विहिवाः ये“य् याःगु ज्याझ्वलय् न्वंवासें विद्यार्थी नेता शर्मां अथे ख्याच्वः बियादीगु खः ।