इन्टरनेट सेन्सरशीपया विश्वन्यंकं विरोध

विकिपिडिनिसें नेपालमण्डल तकं बन्द

संयुक्त राज्य अमेरिकाया संसदय् इन्टरनेट सेन्सरशीप सम्वन्धी छगू विधयेक सप्रस्ताव दर्ता जूगुयात कयाः विश्वन्यंकं विरोध सुरु जूगु दु । उगु सेन्सरशीपया प्रस्तावया विराधोधय् बिकिपिडिया, रेड्डीट, बोइङ बोइङ निसें नेवाःतय्सं चायेकातःगु नेपाल मण्डल डटकमं तकं याःगु दु । उगु सेन्सरशीप लागू जुल धाःसा देय् दुने व पिनेया थीथी समाचार, ब्वग, किपाः,संकिपा नापं सकतां ब्वमिपिन्सं ब्वने मखनीगु अवस्थाय् वइ धकाः नेपालमण्डल डटकमं धाःगु दु । इन्टरनेट स्वतन्त्रता हनन याइगु उगु सोपा विधयेकया विरोधय् म्हिगः बुधवाः विश्वन्यंकं अथे विरोध याःगु खः ।

फेसबुक, गुगल आदि कम्पनीतपाखें नं उकिया विरोध यानाच्वंगु दु । उगु विधयेक संयुक्त राज्य अमेरिकाय् न्ह्यब्वःगु खःसा लागू जुइवं विश्वय् हे इन्टरनेटय् प्रभावित जुइ । थ्व हे दथुइ विश्वय् तसकं लोकंह्वानाच्वंगु विकिपेडिया नापं यक्व हे वेवसाइटपाखें म्हिगः बुधवाः उकिया विरोधय् थःथःपिनिगु सेवा २४ घण्टाया नितिं बन्द तकं याःगु दु । अमेरिकाया क्वय् च्वंगु सदन हाउस अफ रिप्रेजेन्टटिभय् सांसद लमार स्मिथं दर्ता यानादीगु उगु विधयेक व च्वय्या सदन सिनेटय् सिनेटर प्याटिरक लेहीं दर्ता यानादीगु यात अमेरिकाया हे ततःधंगुनिसें चिचीधंगु इन्टरनेट कम्पनीत नापं विश्व मानव अधिकार व स्वतन्त्रता संस्था नापं मनूतय्सं तिव्र रुपं विरोध याःगु दु । नकतिनि जक विश्वया यक्व हे थासय् स्वतन्त्रता व लोकतान्त्रिक अधिकारया नितिं धकाः जूगु आन्दोलनय् अमेरिकी वेबसाइत ट्विटर व फेसबुकया व्यापक प्रयोग जूगु खः । अथे हे अमेरिकाय् जूगु आगेट्ने आन्दोलनय् नं इन्टरनेटया व्यापक प्रयोग जूगु खः ।

विश्वया न्हिइ अढाई करोड मनूतय्सं स्वइगु विकिपेडिया थेंजाःगु प्रभावशाली साइटतपाखें तकं थःपिनिगु सेवा बन्द यानाः विरोधय् क्वहां वयेत्यंगु थ्व न्हापांगु घटना खः । अमेरिका थें जाःगु विश्वन्यकं स्वतन्त्रताया प्रवद्र्धक दावी यानाः वयाच्वंगु अवस्थाय् आः स्वयं अमेरिकायात हे अज्वःगु पलाखं बांमलाःगु लिच्वः लायेफु धकाः तकं मनूतय्सं विश्लेषण यानाहःगु दु ।