मधेसी राजनीतिया दुर्भाग्य

नेपाःया राजनीतिइ मधेस छगू समस्या जुया न्ह्यःने वयाच्वंगु दु । हरेक सरकार गठनया इलय् मधेसीतय्सं छगूकथंया राजनीतिक ब्लायेक मेल यायेगु वा थाइगु वातावरण सृजना जुयाच्वंगु दु । मधेस प्यंगूगु शक्तिया रुपय् न्ह्यःने वयेवं हरेक सरकार गठनया इलय् महत्वपूर्ण थःपिनिगु माग पूवंकेगु छगू अवसर कथं छ्यलेगु यानावयाच्वंगु दु । वर्तमान प्रधानमन्त्री डा. बाबुराम भट्टराईया मन्त्रीमण्डलय् नं गृह, रक्षा, थें महत्वपूर्णगु मन्त्रालयत कयाः सरकारयात थःपिनिगु नाजायज मागत मानय् याकाः नं मधेसीतय्सं थःपिनिगु स्वार्थ पूवंकेगु अपुक अवसर छ्यलावःगु दु । तर थ्व गुलित जायज जू ? न्ह्यसः थःगुहे थासय् दनाच्वंगु दु । नकतिनिहे सद्भावना (आन्दन्दी देवी) पार्टीया नायः व पुलांम्ह आपूर्ति मन्त्री श्यामसुन्दर गुप्तायात व्यापारी पवन संघाइयात अपहरणकर्ताया रुपय् प्रहरीं ज्वंगु दु । भैरहवाय् थःगु हे छेँ ज्वनाः म्हीगतिनि येँय् हःगु दु । व वयकःयात जिल्ला अदालतं प्यन्हु कुनाः अनुसन्धान न्ह्याकेत ई व्यूगु दु ।

पूर्वमन्त्री गुप्तां वंगु पुस ७ गते संघाईयात कमलाछिया गणेद्यःथासं अपहरण यानाः काभ्रेय् यंका तःगु खः । सुरुइ मध्यस्थकर्ता व सुपर भाइजरया ख्वालं न्ह्यःने वःम्ह गुप्तां वीरगञ्जया श्याम गिरीया नामं फोन याकाः सांघाइयाके ध्यबा म्हयेगु यानाच्वन । १ करोड पुलाः पुस २७ गते अपहरण मुक्त जुइवं प्रहरीयात खवर विल । गुप्तां सांघाईपाखे १ करोड म्हयाः गुण्डातातय्त ३० लाख वीगु सम्झौता जूगु खःसां लिपा गुप्तां थःगु बचं पूमवेंकसुें ८ लाख जक गुण्डातय्त व्यूगु खः । थुकिं यानाः गुप्ता व गुण्डातय्गु दथ्वी छगूकथंया असमझदारीं ज्या जूगु खः । थ्वहे विषयलय् अनुसन्धान न्ह्यःने वनेवं काभ्रेया आकाश लामा व हेटौडाया विकास लामा धयाम्ह जितवहादुर गोलेयात प्रहरीं ज्वन । थमिसं हे अपहरणया मू योजनाकार गुप्तायात पोले याःगु खः । गुप्तायात ज्वनेवं प्रहरीं सभामुखयात फोनं जानकारी व्यूगु खः । पुलांम्ह मन्त्री व सद्भावनाया नायः गुप्तां न्हापा पोखराया गुण्डातय्त छ्यलेत्यंगु धाःगु खः । भाः मिलय् मजुइवं इमित त्वःताः काभ्रेयापिं गुण्डातय्त ३० लख वीगु सर्तय् छ्यःगु धाइ ।

धाइ, सांघांइ नं छगू पेट्रो पम्प दयेत गुप्ता आपूर्ति मन्त्री जूवलय् स्वीकृति वीगु वापत १ करोड घुस मागय् याःगु खँ जुयाच्वन । लिपा सांघाइनं उगु ध्यबा अविसे आलताल यायेवं गुप्तां अपहरण याना सां उगु ध्यबा कायेत स्वःगु खनेदु । गुकिया कारणं गुप्ताथें याःम्ह सभासद्, पूर्व मन्त्री व सद्भावनाया नायः अपराधीया रुपय् न्ह्यःने वल व प्रहरीया नियन्त्रणय् लात । थुकिं छु खँ स्पष्ट जुइ धाःसा मधेसया राजनीतिइ वुलुंवुलुं अपराधीकरण जुजुं वनाच्वंगु स्पष्ट जुइ । मधेसया सभासद्तय्सं ह्याउँगु पासपोर्ट मीगु, अपहरण यायेगु, फिरौति म्हयेगु, थः विरोधीतय्त स्यायेगु स्याकेगु यानाः मधेसी जनतायात आतंकित व पीडा वियावयाच्वंगु दु । मधेस थौं अशान्त दु । दलया नेतातहे थुगुकथंया अपराधय् माहीर व सिद्धहस्त जुइवं मधेसय् ऐनकानुन सुनां मानय् याइ ? शान्ति गथ्य जुइ ? ध्यबाया निति पार्टीं तछ्यायेगु, सरकार गठनया इलय् ब्लायक मेल यायेगु लगायत ज्यां मधेस न्हापा हे आक्रान्त जुयाच्वंगु खँ सुनां अस्यूगु खइमखु । फोरम लोकतान्त्रिकरण नायः व संञ्चार मन्त्री जेवी गुप्ता नं भ्रष्टाचारया मुद्दाय् तक्यनाच्वंगु दु । पासपोर्ट काण्डय् लाःपिं मधेसया निम्ह सभासद् जेलय् लानाच्वंगु दु । थुज्वःगु स्थितिइ मधेसी दलया नेतातय्सं मधेसयात गालय् क्वफाइगु वाहेक थकाइगु गथ्य व गवले ? जनता न्ह्यसः तयेगु ई वःगु दु । मधेसया नेतात थुगुहे कथं अपराधया भूमरिइ फसय् जुइगु जुयाच्वनीगु खःसा मधेसया आन्दोलन सही लँपुइ वनाच्वन धायेफैमखु । आन्दोलन यायेगु व अपराधीतय्त नेताया रुपय् न्ह्यःने हयेगु खःसा आन्दोलनया नेतृत्व हिलेमाःगु अवस्था वयाच्वंगु दु धायेहेमाः ।

More Stories Like this