नितिसं प्रम भट्टराईयात ह्ययेकीगु योजना

भारतया विहार सम्मेलनय् प्रमुख अतिथि

येँ (झीगु स्वनिगः)

नेपाःया दक्षिण लागाय् करिव करिव पूर्वमेचींनिसें पश्चिम महाकाली तक दुगु भारतया विहार राज्यं नेपाःया प्रधानमन्त्रीया डा. बाबुराम भट्टराईयात प्रमुख अतिथियानाः सःतादीगु दुसा अबले विहारपाखें ह्ययेकेगु याइगु अवस्था दु । विशेष यानाः विहारया मुख्य मन्त्री नितिस कुमारं अथे नेपाःया दक्षिण सीमापाखे पूर्वमेचींनिसें महाकाली तक नेपालं लः वयाच्वंगु फुक्क कथंया खुसियात पनाः रिङ ड्याय्म दयेकाच्वंगु दु ।
नेपाःया सीमा झ्वःलकं अथे ड्याय्म दयेकाः भारतं फुक्क लःयात सदुपयोग यायेगु ज्या यानाच्वंगु दु । उगु ड्याय्म दयेकेगु ज्या क्वचाल धाःसा नेपाःया तराई लागाय् लः जायाः वयाः मेगु संकत वयेफैगु अवस्था दु ।

उलि जक मखु अथे रिङ ड्याय्म दयेकेगु नितिं माःगु ल्वहं व मेमेगु सामानत तकं नेपाःया पहाड तछ्यानाः यंकाच्वंगु जूसां नेपाल सरकारं छुं हे धाये मफयाच्वंगु अवस्थाय् आः नेपाःया प्रधानमन्त्रीयात ह्ययेकेत अथे प्रमुख अतिथि विहारं यायेत्यंगु खयेमाः धकाः विश्लेषकतय्सं धयाहःगु खः । विहारय् जुइगु उगु सम्मेलनय् वनाः प्रधानमन्त्री डा. बाबुराम भट्टराई नं विहारया नितिं छु यायेगु धकाः बचं बियाः वइगु खः बाय् छु कि सम्झौता यानाः वइगु खः व धाःसा स्वयेगु ल्यं हे दनि । थ्व हे वइगु फागुन ५ गतेनिसें ७ गते तक विहारया पटनाय् जुइगु ‘ग्लोबल समीट अन चेन्जिङ विहारः फर्गिङ पाटनरसीप फर डेभलपमेन्ट’ सम्मेलनय् प्रधानमन्त्री मूपाहां जुइत झायादीत्यंगु खः । भारतलिसे विप्पा सम्झौता यानादीम्ह प्रधानमन्त्री भट्टराई मूपाहां यायेगु विहारया योजना सामन्य मखु धकाः तकं धयाहःगु दु । जःलाखःला देय् भारतया केन्द्रीय सरकारं जक मखु आः नेपाः नाप स्वानाच्वंगु भारतया विहार राज्यं तकं प्रधानमन्त्री भट्टराईलिसे स्वापू तयेत्यंगुयात मनूतय्सं अर्थपूर्ण रुपं कयाहःगु दु ।