थी मफयेक पेट्रोलियम पदार्थया भाः थकाल

ग्यासया १५ सय, मचिकंया ८५, डिजेलया ९० व पेट्रोलया १ सय १५ थ्यन

येँ (झीगु स्वनिगः)

नेपाल आयल निगमं पेट्रोलियम पदार्थया भाः छक्वलं थी हे मफयेक थकाःगु दु । उपभोक्तातय्सं इन्धनया अभाव जुल धकाः तायेकाच्वंगु इलय् आकाझाकां नेपाल आयल निगमं म्हिगः मंगलवाः अथे पेट्रोलियम पदार्थया भाः थकाःगु खः । निगमं जा थुइगु ग्यासय् आवंलि छगः सिलिण्डरया भाः १ सय ७० तका थिके याःगु दु । अथे हे पेट्रोलय् छगू लिटरय् १० तका, डिजेल व मचिकनय् छगू लिटरय् ९ तका भाः थकाःगु दु धकाः निगमया प्रवक्ता मुकुन्द ढुंगेलं जानकारी बियादीगु दु ।

म्हीग सोमवाः तक उपभोक्तातय्सं ग्यास छगलय् १ हजार ३ सय २५ तका पुलाः वयाच्वंगु खःसा आवंलि छगः ग्यास १ हजार ५ सय पुलाः न्यायेमालीगु जूगु दु । अथे हे पेट्रोल छगू लिटरया १ सय ५ तका पुलाः वयाच्वंगुलिइ आवंलि १ सय १५ तका पुलाः न्याये मालीगु जूगु दु । उगु हे कथं छगू लिटर डिजेलया भाः ७६ तका अले मचिकंया भाः ८५ तका पुलाः न्याये मालीगु जूगु दु । उगु हे कथं आन्तरिक हवाई इन्धनपाखे छगू लिटरय् १ सय तका थ्यनाच्वंगुलिइ आः भाः थकाःगुलिं १ सय ५ तका थ्यंगु दु । पुलांगु भाः कथं लच्छिया १ अर्ब ७८ करोड ३१ लाख तका घाटा जुयाच्वंगुलिं अथे पेट्रोलियम पदार्थया भाः थकायेमाःगु खः धकाः नेपाल आयल निगमं धाःगु दु । दंक थिके जुइक न्यानाः दंक मिइमाःगुलिं घाटा जुयाच्वंगु ख“ न्ह्यथसें आयल निगमं अथे पेट्रोलियम पदार्थया भाः थकाःगु खः । अथे पेट्रोलियम पदार्थया भाः थी हे मफयेक थकाःगुलिं यातायात साधनया भाः नं उगु हे कथं थां वनीगु जूगु दु । अले यातायातया भाः थाहां वनेवं जनतातय्त न्हिया न्हिथं माःगु जाकि, तरकारीनिसें फुक्क कथंया सामान तकं तसकं हे थाहां वनीगु प्रायः निश्चित जूगु दु ।

भाः थकाःगुया व्यापक विरोध

पेट्रोलिय पदार्थया भाः थकाःगुयात कयाः एकीकृत नेकपा (माओवादी)या भातृ संगठन अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) नापं मेमेगु संगठनं व्यापक रुपं विरोध याःगु दु । अखिल क्रान्तिकारीं थकाःगु भाः तत्काल क्वमकाल धाःसा कठोर सतक आन्दोलन यायेगु खयाच्वः ब्यूगु दु । अखिल क्रान्तिकारीं अथे आन्दोलनं ब्वलनीगु लिच्वःया जिम्मेवार स्वयं सरकार हे जुइ धकाः नं ख्याच्वः ब्यूगु दु । थ्व हे दथुइ उपभोक्ता हित संसक्षण मञ्च नेपालं नं पेट्रोलिय पदार्थया भाः थकाःगुयात कयाः कडा विरोध याःगु दु ।

मञ्चं नेपाल आयल निगमया घाटा म्हो यायेगु मेमेगु उपाय नालाः मकासे उपभोक्तातय्त हे लिच्वः लाकीगु कथं पेट्रोलियम पदार्थया भाः थकाःगुलिं जनतायात अन्याय याःगु ठहर तकं याःगु दु । आकाझाकां पेट्रोलया भाः थकाःगु विरोधय् मेमेगु संघ संस्थातपाखें नं विरोध याःगु दु ।