कब्जा छेँबुँयात वैध याःगु द्वपं

छेँबुँ लित बिउसा पार्टीइ ल्वापु, मबिउसा सदनय् ल्वापु

येँ (सन्ध्या टाइम्स)/माओवादीं कब्जा यानातःगु सर्वसाधारण मनूतय् छेँबुँ लित बीगु धायेवं माओवादी दुने हे विरोध सुरु जुलसा आः उगु छेँबुँ लित कायेगु खःसा प्रमाण ज्वना वयेमाः धकाः निर्णय यायेवं विपक्षी पार्टीतय्सं विरोध सुरु याना हःगु दु ।

थःपिंसं कब्जा यानातःगु छेँबुँयात वैध यायेगु पलाः न्ह्याकीन धासें नेपाली कांग्रेस व एमालेया सभासद्तय्सं म्हिगः कडा रुपं विरोध प्रकट याःगु खःसा थ्व ज्यायात मदिकूतले माओवादीलिसे मेगु नं छुं हे कथंया वार्ता यायेगु मखु धकाः उमिसं निर्णय यायेधुंकूगु दु। थुकथं म्हिगः सरकारं सःतूगु छगू शीर्ष नेतातय्गु बैठक नं कांग्रेस व एमालें बहिष्कार याःगु दु। माओवादीं कब्जा यानातःगु छेँबुँ लित बीगु धकाः सम्झौता यायेधुंकाः आः छेँबुँ लित बीगु पलेसा अःखतं अज्याःगु कब्जायात हे मान्यता बीगु ज्या यायेत्यन धकाः कांग्रेस व एमालें विरोध याःगु खः ।

उखे माओवादीं धाःसा कब्जा छेँबुँयात वैद्य यायेगु थःपिनि कुतः मखु धकाः खण्डन याःगु दु। थ्व छेँबुँ कब्जा यानातःगु यक्व दयेधुंकल उकिं सुयागुं खःसा निस्सा ज्वनाः काः वंसां जिउ, मुद्दा लानाच्वंगु दुसा अदालतय् वनाः फुकुवा यानाः काःसां जिउ जक धयागु खः धकाः माओवादीं स्पष्ट नं याःगु दु ।

थ्व न्हूगु विवादं यानाः विपक्षीतय्सं सदन अवरुद्ध याना बिल धाःसा शान्ति प्रक्रिया व संविधान निर्माणया ज्या हानं दथुइ तुं दिउ वनीगु चिन्ता नं सभासद्तय्सं याना हःगु दु।
वैद्य पक्षया नेतात नापलालां प्रचण्ड सरकारं याःगु ज्यायात कयाः विपक्षीतय्सं विरोध यानाच्वंगु इलय् उखे पार्टी अध्यक्ष प्रचण्ड धाःसा थःगु हे पार्टीया विपक्षीतय्त ह्ययेकेगु ज्याय् लगे जुयादीगु दु। थम्हं धाःगु खँ असन्तुष्ट नेता मोहन वैद्यं न्यंसां वैद्य पक्षया मेपिं नेतातय्सं धाःसा मन्यनीगु जुयाः अथे खँ मन्यनीपिं वैद्य पक्षीय नेतातय्त थम्हं हे नापलानाः खँ ल्हायेगु ज्याय् प्रचण्ड लगे जुयादीगु खः। थ्व झ्वलय् वय्कलं वैद्य पक्षया कडाम्ह नेता नेत्रविक्रम चन्दयात नापलानाः खँल्हानादिल। वैद्य व थः दथुइ जूगु सहमतियात स्वीकार यानाः जनताया पक्षय् संविधान जारी याकेत ग्वाहालि यायेमाल धकाः प्रचण्डं चन्दयात सम्झे यानादीगु खः ।