चुनावया तयारी यायेगु लाकि मयायेगु?

हानं संविधानसभाया चुनाव

येँ (सन्ध्या टाइम्स)/संविधानसभाया म्याद उकुन्हु खुला थपे यायेधुंकाः आः मेगु थपे याये दइ मखुत धकाः सर्वोच्च अदालतं बिउगु आदेश लिपा थीथी निकायतय्त थीथी कथंया चिन्ता जूसां निर्वाचन आयोगयात मेगु हे कथंया चिन्ता जूगु खँ सीदुगु दु। छुं जुयाः संविधानसभां आः ल्यं दनिगु न्यालाया दुने नं न्हूगु संविधान दयेके मफुत व सर्वोच्चया आदेश लागू हे जूवन धाःसा ला हानं मेगु संविधानसभाया चुनाव यायेमालीगु जुइ। अज्याःगु अवस्थाय् हानं संविधानसभाया हे चुनाव याये फइगु अवस्था दइगु खः लाकि मखु? थ्व खँय् निर्वाचन आयोग चिन्तित जूगु सूत्रया दावी दु ।

संविधानसभां न्यालाया दुने नं संविधान दयेके मफुत धाःसा वयां लिपा चुनाव यायेगु पाय्छि जुइ लाकि जुइ मखु धइगु खँय् तकं आयोग दुने चर्चा जूगु खँ अन दुनेया छगू सूत्रं कंगु दु। निर्वाचन आयोगं आः न्याला लिपा हे चुनाव यायेमाली धइगु अनुमान यानाः छुं नं तयारी याःगु मदुनि। छाय्धाःसां अबलय् चुनाव यायेगु घोषणा आः तक जूगु मदुनि। चुनाव हे घोषणा मजुइकं संविधानसभा थेंज्याःगु निकायया निक्वःगु चुनाव यायेगु तयारी आवंनिसें यायेबलय् उकिं मेगु हे अर्थ लगे जुइफु। छुं जुयाः न्याला लिपा वयाः चुनाव यायेगु धकाः घोषणा यात धाःसा चुनावया लागिं तयारी यायेत हे न्याला खुला बिउ वनी। उगु न्याला खुला ईया दुने ला संविधान हे च्वये सिधये लाः। उकिं चुनावया तयारी यायेगु लाकि मयायेगु, यायेगु खःसां गय् यानाः यायेगु धइगु खँय् निर्वाचन आयोगया कपाः स्यानाच्वंगु सूत्रया दावी दु ।

थज्याःगु हे विषयय् बिचाः ब्याकेगु लागिं छुं ई न्ह्यः तिनि येँय् छगू अन्तर्क्रिया ज्याझ्वः नं याःगु खः। चुनाव पर्यवेक्षण याइपिं मानवाधिकारवादीतय्गु ग्वसालय् उगु ज्याझ्वः जूगु खःसां उकिया डिजायन धाःसा निर्वाचन आयोगं हे याःगु खः। उगु अन्तर्क्रियाय् भोजराज पोखरेल, सूर्यप्रसाद श्रेष्ठ थेंज्याःपिं पुलांपिं निर्वाचन आयुक्तपिंसं नं चुनावया तयारी बारे थःपिनि बिचाः तयादीगु खः । वय्कःपिंसं आयोगयात न्याला लिपा चुनाव जुइ धइगु मानसिकता दयेकाः तयारी यानाच्वनेमाः धकाः सुझाव बियादीगु खः। ज्याझ्वः लिपा अन वःगु सुझावयात कयाः निर्वाचन आयोगय् अनौपचारिक सहलहत जुयाच्वंगु खँ धाःगु दु ।