प्रधानमन्त्री द्यनीगु खाता

सम्पादकजु,

संविधानसभाया २२ दलया समर्थनय् जनताया मत मखयां नं बहुसंख्यक जनप्रतिनिधिपिनिगु अग्राधिकारया मतं प्रधानमन्त्री जुयादीम्ह कम्युनिष्ट प्रधानमन्त्री माधव कुमार नेपाल प्रधानमन्त्रीया सरकारी निवास वालुवाटारय् च्वंवनादीबलय् निवर्तमान प्रधानमन्त्री पुष्पकमल दाहाल 'प्रचण्डं' छ्यला वंगु 'खाता'य् द्यने मखु बरु व खातायात प्रम द्यनीगु क्वथां चीकाः उकियात संग्रहालयय् तयेके बीगु खँ संचार माध्यमय् बय्बय् जुयाः पिज्वल ।

खय्त ला निवर्तमान प्रधानमन्त्री पुष्पकमल दाहाल ुप्रचण्डु छम्ह सर्वहारा नेता जुयां नं प्रधानमन्त्री जुइ धुंकाः थः द्यनेत वालुवाटारय् छगूत्या लाख तूगु खाता न्याके बियाः बुर्जुवा शोखं याना जुल धकाः आलोचित जुयादिल ।

खाताया खँ वइबलय् मल्लकालया नेवाः राज्यय् जुजु सिद्धि नरिसंह मल्लं छ्यलावंगु ल्वहंया खाता पाप धर्मया बाखं नापं आःतक नं तुसाहिति सुन्दरी चोक चुकय् खुल्ला आकासया क्वय् ब्वयातःगु थौंतक नं दनि । लिपांम्ह शाह जुजु ज्ञानेन्द्र नारायणहिति राजदरवार त्वःते वने माल । थौं वयाः नारायणहिति राजदरवार संग्रहालयय् परिणत जुयाः सर्वसाधारणयात अन दुने स्वः वनेगु अवसर वःगु दु । अन शाह जुज व लानि द्यनीगु खाता नं थौं सर्वसाधारणं स्वये खन । शाह जुजुं दरवार दुने छ्यःगु खाता संग्रहालयय् तयेत जुजु मदुगु दरवार दुगुलिं छुं समस्या मवल याउँसे हे च्वन । तरवर्तमान प्रधानमन्त्रीं निवर्तमान प्रधानमन्त्री छ्यःगु खाता तयेत थाय् गन मालेगु थ्व प्रश्न ब्वलंगु दु । उगु खाता संग्रहालयय् ब्वयेत कि मखुसा बालुवाटारया प्रम निवासयात नं गणतन्त्र नेपाःया न्हापांम्ह निर्वाचित प्र।म। च्वंगु निवास धकाः संग्रहालय् घोषणा याये माल । कि मखुसा छम्ह सच्चाम्ह कम्युनिष्ट प्रधानमन्त्री धकाः सिद्ध यायेत येँ देशय् थःगु कूल छेँ मखुसां २०४६ सालया राजनीतिक परिवर्तन लिपा येँ देशय् दयेकूगु भव्य महलयात सरकारं स्रंग्रहालय दयेकेत दान बियादी माल । थथे जुल धाःसा कम्युनिष्ट नेतातय् गैर कम्युनिष्ट रहनसहन सर्वसाधारण जनतां स्वयेगु मौका चूलाइ । दसुया लागिं इतिहासविद् डा. डिल्लीरमण रेग्मीं थःगु करोडौंया छेँ सम्पत्ति नापं मवंगु सपुू फुक्कं सरकारयात लःल्हानाः संग्रहालयय् परिणत यानावंगु दु । गुकिया लागिं नेपाःमि जनता वय्कःप्रति नतमस्तक जुयाच्वंगु दु । थुकथं जूसा जनतां धाथें दुनुगलंनिसें क्वखायेगु खादा लःल्हानाः जननेताया रुपय् नुगलय् बासं बियाः तया तइगु जुइ ।

- ब्रम्हदेव 'प्रदीप', ओकुबहाल, यल-६ ।

More Stories Like this