छेँ थुनेगु ज्याया विरुद्ध कांग्रेस व एमालेया नेतात
येँ (सन्ध्या टाइम्स)/राजधानी येँदेय्या थीथी थासय् च्वंगु छेँ थुनाः सतक तब्या यायेगु अभियानय् लगे जूगु नगर विकासं आः थुकियात कयाः व्यापक विरोध जुइवं थ्व अभियानयात कयाः पुनर्विचार यायेत्यंगु खँ सीदुगु दु। नगर विकासं थुकिया बारे आः सरकार सल्लाह यायेत्यंगु खँ सूत्रं धाःगु दु ।
थ्वहे झ्वलय् जनताया छेँ थुनाः सतक तब्या यायेगु थ्व ज्याया विरोधय् उकुन्हु तक कांग्रेसया नेतात जक लगे जुयाच्वंगु खःसा आः एमालेया नेतात नं सहभागी जूवःगु दु। म्हिगः लैनचौरंनिसें महाराजगंज तकया लँय् लाःपिं पीडित जनताया संघर्ष समितिं याःगु सभाय् एमाले महासचिव ईश्वर पोखरेलं नं संवोधन यासें छुं हे विकल्प मबिसे जनताया छेँ थुनेगु ज्या धइगु जनताया सःयात माने मयायेगु खः धयादिल ।
अथे हे नेपाली कांग्रेसया महामन्त्री लिसें सभासद् प्रकाशमान सिंहं नं छेँ थुनेगु ज्याया विरोध यासें थ्व ज्या सरकारी आतंक हे खः धयादिल। थ्व विषययात कयाः नेपाली कांग्रेसया सभासद् नरहरि आचार्य व नवीन्द्रराज जोशीं न्हापा हे विरोध यायेधुंकूगु दु ।
सरकारया थ्व ज्याया विरुद्ध त्वाःत्वालय् पीडिततय्सं संघर्ष समिति दयेकाः प्रतिकार सुरु याना हःगु दु ।
