गन्धर्भयात सरकारपाखें छेँ
धुर्कोट् (सन्ध्या टाइम्स)/विपन्न वर्गय् लाःगु गन्धर्भयात आः सरकारं हे छेँ दनाबीगु जूगु दु। भौतिक योजना व निर्माण मन्त्रालयया जनता आवास ज्याझ्वलं गुल्मीया धुर्कोट् रजस्थल, बम्घा व कुर्घा गा.वि.स. या विपन्न गन्धर्भया निंतिं छेँ दनाबीत्यंगु खः ।
जनता आवास ज्याझ्वः जिल्ला समिति गुल्मीया न्हापांगु बैठकं न्हापांगु चरणय् थुपिं गाविस य् छेँ दनाबीगु व ल्यं दुगु थाय्या अध्ययन यायेगु निर्णय याःगु संयोजक व सभासद् सुदर्शन बराल मगरं धाःगु दु। थुकिया लिसें सरकारं वि.सं. २०६६ सालंनिसें न्ह्याकूगु ज्याझ्वः २८ औं जिल्लाया रुपय् गुल्मीइ न्ह्याःगु व न्हापांगु धुर्कोट्, रजस्थल, बम्घा व कुर्घाया प्रत्येक गाविसय् न्यागूया ल्याखं झिंन्यागू परिवारया लागिं छेँ दना बीगु खँ नं मगरं धाःगु दु ।
राष्ट्रिय दलित आयोगं दलितया धलखय् तयातःगु व अति विपन्न परिवारया लागि छेँ दनाबीगु ज्या�वः कथं न्हापांगु अध्ययनया झ्वलय् थुपिं गाविसया गन्धर्भ प्राथमिकताय् लाःगु खँ बरालं धाल। बैठक धुंकाः जूगु पत्रकार सम्मेलनय् सभासद बरालं वइगु दिनय् जिल्लाया मेमेगु गाविस या विपन्न वर्गया लागि छसिकथं छेँ दनाबीगु जानकारी नं बिल ।
समितिया सहसंयोजक व प्रमुख जिल्ला अधिकारी कविन्द्र नेपालं भवन डिभिजन कार्यालय पाल्पां विस्तृत अनुगमन यायेधुंकाः परिवार ल्ययाः निर्माण समिति गठन यानाः ज्याझ्वः न्ह्याकेगु जानकारी बिल ।
