सामुदायिक विद्यालयया व्यवस्थापन बारे सहलह मुँज्या
येँ (सन्ध्या टाइम्स)/सामुदायिक विद्यालय राष्ट्रिय नेटवर्क येँ जिल्लाया ग्वसालय् थनया विद्यालयय् जुयाच्वंगु व्यवस्थापनया वर्तमान अवस्थायात कयाः सहलह मुँज्या जुल। जुद्धोदय हाइस्कूलय् जूगु उगु ज्याझ्वलय् 'नेपाल सरकारया शिक्षा कार्यक्रम' विषयय् यमबहादुर खड्कां ज्यापौ न्ह्यब्वयादीगु खःसा उगु ज्यापौयात कयाः ज्याझ्वलय् उपस्थितिपिनि दथुइ व्यापक सहलह नं जूगु खः। अथे हे ज्याझ्वलय् विश्व बैंकया मोहन अर्यालं सामुदायिक विद्यालययात बियातःगु नियम व निर्देशिकां प्राप्त जुइमाःगु अधिकार प्राप्त यायेगु निंतिं फक्व याकनं सम्बन्धित क्षेत्रय् यंकेमाःगु बिचाः प्वंकादिल ।
ज्याझ्वलय् थःगु बिचाः प्वंकेगु झ्वलय् जिल्ला शिक्षा अधिकारी बैकुण्ठ अर्यालं सामुदायिक विद्यालययात स्वयात्तताया अधिकार बियातःगु दु वा मदु धइगु खँ स्पष्ट मजूगु खँ कनादिल। थुकिया लिसें ज्याझ्वलय् थीथी स्कूलया प्रधानाध्यापक व प्रतिनिधिपिंसं नं थःथःगु समस्या न्ह्यब्वसें थःपिंत जुयाच्वंगु मगाःमचाःया खँ न्ह्यथनादिल। अले सुधारया निंतिं सम्बन्धित निकायय् याकनं न्ह्यब्वयेगु खँ नं ज्याझ्वः हे क्वःछिउगु खः।
ज्याझ्वलय् शिक्षा विभागया उपसचिव यमबहादुर खड्कालिसें स्वीगुलिं मल्याक स्कूलया प्रधानाध्यापकपिंसं ब्वति कयादीगु खः ।
ग्वसाः खलःया न्वकु मदनसेन बज्राचार्यं लसकुस यानादीगु उगु ज्याझ्वलय् छ्यांज्ये विश्वभक्त श्रेष्ठं सुभाय् न्वचु बियादीगु खः। ज्याझ्वः ग्वसाः खलःया नायः दिलिपराज वन्तया सभापतित्वय् न्ह्याःगु खः ।
