अपराध व राजनीति आः नापनापं हे

राजनीति अपराधीकरणपाखे ब्वाँय् वनाच्वंगुया मेगु छगू दसिया रुपय् पुलांम्ह मन्त्री लिसें नेपाल सद्भावना पार्टीया अध्यक्ष श्यामसुन्दर गुप्तायात प्रहरीं फौजदारी मुद्दाय् ज्वंगु दु। अपहरण थेंज्याःगु संगीन अपराधया द्वपं बियाः गुप्तायात ज्वनेवं राजनीति व अपराध आः गुलि सतिक लायेधुंकल धइगु खँ नं छ्याताहां जुइक खने दया बिउगु दु। व्यापारी पवन संघईयात अपहरण यानाः वयापाखें करोडौं दां फिरौटीया रुपय् कायेगु गुप्ताया योजना नं थुकिया नापनापं सार्वजनिक जूगु दु। उकुन्हु तक अपराधीतय्त राजनीतिक नेतातय्सं संरक्षण बियातल धकाः जक खँ पिहां वयाच्वंगु खःसा थ्व घटना लिपा राजनीतिक नेतात थः हे अपराधय् संलग्न जुइधुंकल धइगु न्हूगु तथ्य नं जनताया न्ह्यःने सार्वजनिक जूगु दु ।

गुप्ताया थ्व प्रकरणं राजनेतात खास यानाः तराई केन्द्रीत पार्टीया नेतात प्रति जनताया वितृष्णा अझ तच्वः जुया वनीगु निश्चित दु। थज्याःपिं राजनीतिक नेतातय्सं यानाः छखे राजनीति दुर्गन्धं जाया वःगु दुसा मेखे अपराधयात साः तयेगु ज्या नं जू वनाच्वंगु दु। वास्तवय् थज्याःपिं नेतात नेतृत्वय् दुगु कारणं यानाः हे गजेन्द्रनारायण सिंहया सद्भावना पार्टी कुचा कुचा जूवंगु खँ नं आः लिसा कयाः धाये माली मखु। थ्व प्रकरणय् गुप्तायात माःगु कानुनी कारवाही ला जुइ हे जुइ। तर थुकिं नेपाली समाज व राजनीतिइ लाकीगु नैतिक क्षति धाःसा गुप्तायात कारवाही यानां जक पूवनीगु खने मदु। मन्त्री थेंज्याःगु पदय् थ्यनेधुंकूम्ह मनू अपहरण थेंज्याःगु अपराधय् प्रत्यक्ष सरिक जुइगु नेपाःया राजनीतियात हे लाःवंगु छगू तःधंगु नैतिक धक्का खः ।

More Stories Like this