बाखं दबूया पाल्पा समीक्षा

बाखं दबू पाल्पाय् नेपालभाषाया साहित्य गोष्ठी यानाः लिहां वयेधुंकाः उकिया समीक्षा यायेकथं वंगु शनिवाः सातोआकि स्मृतिभवन, क्वपुंदोलय् छगू बाखं मुँज्या जुल। स्वनिगलं पाल्पाय् झाःपिं बाखं च्वमिपिनिगु बाखं पाठ याये ल्यं दनिगु न्यनेकने यायेगु ल्याखं थ्व मुँज्या जूगु खः। बाखं दबूया नायः भाजु लक्ष्मण राजवंशीया सभापतितवय् जूगु उगु बाखं गोष्ठीइ च्वमिपिं मथुरा साय्मि, विमला शाक्य, विजयरत्न असंबरे, मोहिनी चित्रकार, शाक्य सुरेन, बिमलप्रभा बज्राचार्य, बद्री वेदना, मिना बज्राचार्य, कृष्णभक्त बोडे, दया खड्गी वेचैन, प्रा. नर्मदेश्वर प्रधान, राजेन्द्र रंजित व सरस्वति तुलाधरपिसं बाखं ब्वनादीगु खः ।

ज्याझ्वलय् ब्वंगु बाखंयात कयाः समालोचक पुष्पबहादुर चित्रकार, राजा शाक्य, केदार सितु, शशिकला मानन्धर, नारद बज्राचार्य आदिपिंसं समीक्षात्मक टिप्पणी यानादीगु खः। बाखं तत्वयात कयाः लक्ष्मण राजवंशीं नुगःखँ प्वंकादीगु थुगु ज्याझ्वलय् बाखं सम्बन्धी अन्तर्क्रिया यायेगुया नापं पाल्पा साहित्यिक भ्रमणया समीक्षा नं जूगु खः ।

थ्वयां न्ह्यः बाखं दबू छवाः न्ह्यः पाल्पाय् साहित्य गोष्ठी यानाः लिहां वयेगु झ्वलय् पोहेलाथ्व १४ आइतबाः कुन्हु सुथय् बुटवलया नेवाः पुचः नाप म्हसीका कालबिल यायेगु ज्या जुल। बुटवल माध्यमिक विद्यालयस जूगु ज्याझ्वलय् बाखं दबूपाखें भगतदास श्रेष्ठं नेवाः पुचःया सल्लाहकार भाजु बिमल बहादुर शाक्य, पुलांम्ह नायः विष्णु प्रसाद श्रेष्ठ, नायः अरुणालाल श्रेष्ठ, दुजः शम्भूलाल श्रेष्ठ व ल्याय्म्ह पुचःया नायः शहनशील लिगलपिंत खादागां क्वखायेकाः हनादीगु खः। अन बिमल बहादुर शाक्य व लक्ष्मण राजवंशीपिंसं न्ववानादीगु खः ।

थ्व कुन्हु हे न्हिनय् नारायणगढया रामेश्वर पुस्तकालय्, क्षेत्रपुरय् नेवाः देय् दबू जिल्ला समन्वय समिति व नेवाः पुचः, चितवनया मंकाः ग्वसालय् चितवनया साहित्यिक अनुरागीपिनि दथुइ नाप लायेगु ज्याझ्वः जुल। भाजु प्रेम विनोद 'नन्दन' या सभापतित्वय् जूगु थुगु ज्याझ्वलय् बाखं दबूया उद्देश्यबारे बिजयरत्न असंबरें न्ववानादीगु खः। गायक पवित्र कसाःनं म्येँ हालादीगु व शरद कसाः नं बाखं ब्वनादीगु खः ।

ज्याझ्वलय् स्थानीय विनोद पौडेल, केशवलाल श्रेष्ठ आदिपिसं साहित्य पाठ यायेगु व नुगः खँ प्वंकादीगु खः। बाखं दबूपाखें सकल पाहाँपिंत खादागां क्वखायेकेगुया नापं नेवाः पुचःया निंतिं नायः चिजकुमारश्रेष्ठयात मतिनाचिं कथं गणेद्यः लःल्हायेगु ज्या जूगु खः। साहित्यया बारे लक्ष्मण राजवंशीं न्ववानादीगु खःसा ज्याझ्वः देय् दबूया न्वकु विजयप्रकाश तण्डुकारं न्ह्याकादीगु खः ।

More Stories Like this