उत्तर पुस्तिका परीक्षण सम्बन्धी कार्यशाला

ख्वप (झीगु स्वनिगः)

निजी लिसे आवासीय विद्यालय अर्गनाइजेसन नेपाल (प्याब्सन) ख्वपं जिल्लाया माध्यमिक विद्यालय तहलय् अध्यापनरत शिक्षकतय्गु नितिं उत्तर पुस्तिका परीक्षण व सम्परीक्षण सम्बन्धी छन्हुया कार्यशाला गोष्ठीया ग्वसाः ग्वःगु दु । गोष्ठीइ माध्यमिक तहलय् परीक्षार्थीया उत्तर पुस्तिका परीक्षण यायेबलय् ध्यान बिइमाःगु विषयया बारे जानकारी ब्यूगु खः । ज्याभ्mवलय् पाठ्यक्रम विकास केन्द्रया ल्यू छ्याञ्जे तुलसी आचार्य, परीक्षा नियन्त्रण ज्याकू सानोथिमिया अधिकृत देवीरमण हुमागार्इं लगायतं उत्तर पुस्तिकाया परीक्षण व सम्परीक्षणयात गुकथं प्रभावकारी दयेके फइगु धइगु बारे गोष्ठीइ ब्वति दुपिं शिक्षकतय्त जानकारी बियादीगु खः । गोष्ठीइ जिल्लाया थीथी विद्यालयसं अध्यापनरत गुइन्याम्ह शिक्षकपिनिगु ब्वति दुगु खः ।

प्याब्सन ख्वपाखें सोमबाःनिसें न्ह्याकूगु एसएलसी सेन्टअप व आसन्न प्रवेशिका परीक्षाया उत्तर पुस्तिकाया परीक्षणयात विश्वसनीय व प्रभावकारी दयेकेत गोष्ठीं महत्वपूर्ण भूमिका निर्वाह याइगु प्याब्सन ख्वपया नायः राजकुमार महर्जनं जानकारी बियादिल ।
थ्वहे दथुइ थुगु दँया शैक्षिक सत्र क्वःमचायेवं हे निजी विद्यालयतय्सं न्हूगु भर्नाया नितिं बिज्ञापन यायेगु ज्या न्ह्याकेवं जिल्ला शिक्षा ज्याकुथिं अज्याःगु ज्या पनेत निर्देशन बियाः झिंन्यान्हुयादुने शुल्क विवरण बुझय् यायेत जिल्लाया फुक्क विद्यालययात पत्राचार याःगु दु ।

जिल्ला शिक्षा अधिकारी मानबहादुर क्षेत्रीं विद्यालयतय्सं शुल्क सम्बन्धी फुक्क विवरण पेश मयासा व नियम अःखः भर्ना प्रक्रिया न्ह्यःने न्ह्याकूसा कारबाही याइगु धयादिल ।
छुं दिं न्ह्यः जक अभिभावक संघ नेपाल ख्वपं निजी विद्यालयतय्सं मनोमानी ढंगं थिकयेक शुल्क निर्धारण यानाः न्हूगु भर्नाया नितिं बिज्ञापन याःगु धासें विरोध याःगु खः ।